Kvazımemlekettik sektordaǵy mekemeler jumysyn qaıta pysyqtaý kerek - senator

NUR-SULTAN. QazAqparat - Tıimsiz kvazımemlekettik sektoryndaǵy mekemelerdiń jumysyn qaıta qarastyrý kerek. Bul týraly týraly Parlament Senatynyń jalpy otyrysynan keıin depýtat Erbolat Muqaev málim etti, dep habarlaıdy QazAqparat tilshisi.

Búgin palatanyń jalpy otyrysynda «QR Úkimeti men Esep komıtetiniń 2018 jylǵy respýblıkalyq bıýdjettiń atqarylýy týraly esepteri talqylandy.

«Negizi, tıimsiz búkil kvazımemlekettik sektoryndaǵy mekemelerdiń barlyǵyn qaıta qarastyrý kerek. Kerek bolsa, keıbirin jaýyp tastaý qajet. Óıtkeni, memleket qarajaty olarǵa bólinip otyr. Al osydan memlekettiń ekonomıkasyna paıda bolmasa, olardy jabý qajet degen pikirdemin», - dedi senator.

Budan bólek E. Muqaev elimizdegi makroekonomıkalyq kórsetkishterge toqtaldy.

«Jalpy ekonomıkamyzdyń damýy jaman emes. Іshki jalpy ónim 4,1 paıyzǵa (2018 jyly) ósip otyr. Sonymen qatar, bıýdjettiń kiris jaǵy da jáne shyǵys bóligi de 100 paıyz oryndaldy. Degenmen de tıisti kemshilikter de bar. Birinshi kemshilik, bizdiń shıkizatqa táýeldiligimizge baılanysty. Ekinshiden, bankter jaǵdaıynyń tómendeýi saldarynan, bizdiń ekonomıkaǵa tıisti áseri bolmaı tur», - dedi depýtat.

Osy oraıda senator ekinshi deńgeıli bankter nesıeleriniń paıyzdary tómen bolýy kerektigin, bul nesıeler uzaq merzimge negizdelýi qajettigin atap ótti.

«Bul sharalar oryndalǵan kezde ekonomıkamyzǵa tıisti paıdasy bolady. Memleket ekinshi deńgeıli bankterge biraz qoldaý jasady. Endi osy qoldaýdyń qaıtarymy josparly deńgeıde oryndalýy kerek», - dedi E. Muqaev.

Onyń paıymynsha, 2018 jylǵy respýblıkalyq bıýdjettiń atqarylýy baǵytynda mınıstrlikter qoldarynan kelgenshe jumystardy iske asyrdy.

«Memleket áleýmettik salaǵa eleýli túrde kóńil bólip keledi. Úkimet bul salany nazarda ustap, ataýly áleýmettik kómek bólý, járdemaqy somasyn ósirý jáne basqa da sharalardy júzege asyryp jatyr», - dedi Erbolat Muqaev.