Kvazımemlekettik sektorda joǵary laýazymdy basshylar paramen ustaldy
ASTANA. QazAqparat - QR Sybaılas jemqorlyqpen kúres jónindegi ulttyq bıýronyń Astana qalasy boıynsha departamenti úlken basshylardyń ustalǵanyn jarııalady, dep habarlaıdy QazAqparat tilshisi.
Departament basshysy Shyńǵys Qabdolanyń aıtýynsha, sońǵy tórt aıdyń ishinde qala boıynsha 4 mlrd teńgeniń zań buzýshylyqtary anyqtaldy. Barlyq aqsha bıýdjetke qaıtaryldy. «Qazir 32 adam jaýapqa tartylyp otyr. Olardyń ishinde 15 tulǵa - memlekettik organdardyń birinshi basshylary. Beseýi respýblıkalyq mekemeni basqarǵan. Bul tek Astana boıynsha ǵana. Bunyń barlyǵyn buqaralyq aqparat quraldarynda da kórsetip jatyr. Búgin ǵana kvazımemlekettik sektorda jumys isteıtin úlken basshylar ustaldy. Men osy jerge kelerdiń aldynda bildim. Ol basshylar iri kólemde para alǵan. Bir-eki kúnniń ishinde ony da buqaralyq aqparat quraldarynda jarııalaıdy dep oılaımyn», - dedi Sh.Qabdolla Astanada ótken jıynda.
Aıta keteıik, búgin QR Aýyl sharýashylyǵy mınıstrligi Sý resýrstary komıtetinde jemqorlyq máseleleri talqylandy. Shara barysynda QR Memlekettik qyzmet isteri jáne sybaılas jemqorlyqqa qarsy kúres agenttiginiń mamandary komıtet qyzmetkerlerine osy saladaǵy tártip buzýshylyqtar týraly aıtyp berdi.
