Kvazımemlekettik sektorda jemqorlyqqa qarsy komplaens-qyzmetter ınstıtýty engizilýde
«Zań jobasy sybaılas jemqorlyq kórinisterin júıeli túrde aldyn alý boıynsha qosymsha sharalar engizýge baǵyttalǵan. Zań jobasynda túzetýlerdiń úsh blogy qarastyrylǵan. Túzetýlerdiń birinshi blogy sybaılas jemqorlyq kórinisterin júıeli túrde aldyn alý boıynsha qosymsha sharalardy engizýge kózdeıdi. Atap aıtqanda, Azamattyq kodekste syıǵa tartýshynyń paıdasyna is-áreketter úshin ózine sybaılas jemqorlyqqa qarsy shekteýler qabyldaıtyn memlekettik qyzmetshilerge jáne ózge de tulǵalarǵa kez kelgen qundy syılyqtardy syıǵa tartýǵa tyıym salynady. «Syıǵa tartý» atty 509-baptyń qoldanystaǵy redaktsııasyna sáıkes, memlekettik qyzmetshilerge quny 10 aılyq eseptik kórsetkishke (26 510 teńgege) deıin syılyqtar berýge bolady. Osyǵan oraıda Konstıtýtsııalyq Keńes 2018 jylǵy 5 maýsymdaǵy joldaýynda osy bapty qoldanystaǵy zańnamaǵa sáıkes keltirý qajettigin tikeleı kórsetti. Ekinshiden, «Sybaılas jemqorlyqqa qarsy is-qımyl týraly» Zańda sybaılas jemqorlyqqa qarsy shekteýler qabyldaıtyn tulǵalardyń otbasy músheleriniń materıaldyq syıaqy, syılyqtar nemese kórsetiletin qyzmetterdi qabyldaýyna tyıym salynady», - dedi QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov.
Osy oraıda ol Qylmystyq kodekske sáıkes kelmegendikten atalǵan 509- bapty alyp tastaý usynysy engiziletinin naqtylady.
Oljas Bektenovtyń sózine qaraǵanda, memlekettik laýazymǵa, memlekettik nemese olarǵa teńestirilgen mindetterdi atqarýǵa baılanysty laýazymǵa kandıdattar bolyp sanalatyn adamdar úshin uıymnyń basshylyǵyn osy uıymda jumys isteıtin týystary týraly jazbasha nysanda habardar etý mindettemesi engiziledi.
«Memleket basshysy qatysqan sybaılas jemqorlyqqa qarsy is-qımyl máseleleri jónindegi 2019 jylǵy 20 mamyrdaǵy keńeste aıtylǵan jáne birlesip maquldanǵan jemqorlyqqa qarsy is-qımyl jónindegi usynystardy iske asyrý maqsatynda, kvazımemlekettik sektor uıymdarynda parasattylyqtyń korporatıvtik standarttaryn saqtaýǵa jaýapty sybaılas jemqorlyqqa qarsy komplaens-qyzmetter ınstıtýty engizilýde», - dedi Agenttik tóraǵasynyń birinshi orynbasary.
Onyń atap ótýinshe, túzetýlerdiń ekinshi blogy olqylyqtar men qaıshylyqtardy joıýǵa baǵyttalǵan. Ákimshilik quqyq buzýshylyq týraly kodekstiń birqatar baptarynda materıaldyq syıaqy, syılyqtar, jeńildikter men qyzmetter kórsetýge jáne qabyldaýǵa tyıym salynǵan tulǵalardyń tizbesi laýazymdy tulǵalar men jaýapty memlekettik laýazymdy atqaratyn tulǵalarmen tolyqtyrylýda.
«Sybaılas jemqorlyqqa qarsy is-qımyl týraly» Zańda sybaılas jemqorlyq quqyq buzýshylyq týraly aqparaty bar adamnyń sybaılas jemqorlyqqa qarsy is-qımyl jónindegi ýákiletti organdy ǵana emes, sondaı-aq óz quzyreti sheginde sybaılas jemqorlyq quqyq buzýshylyqtardy anyqtaýdy, jolyn kesýdi, ashýdy, tergeýdi jáne aldyn alýdy júzege asyratyn basqa da memlekettik organdardy (prokýratýra, ulttyq qaýipsizdik, ishki ister organdary, áskerı polıtsııa, Ekonomıkalyq tergeý qyzmeti, Ulttyq qaýipsizdik komıtetiniń shekara qyzmeti) habardar ete alatyndyǵy kózdelgen», - dedi Oljas Bektenov.