Kvazımemlekettik sektor úshin komplaens-qyzmetter qurý mindetti boldy - Anar Jarova
«2017 jyly sybaılas jemqorlyq qylmysy úshin Bilim jáne ǵylym mınıstrliginiń vedomstvolyq baǵynysty kompanııalarynyń biriniń basshysy sottaldy. Osyǵan qaramastan, bul adam kvazımemlekettik uıymnyń basshysy laýazymynda jumysyn jalǵastyra otyryp, basqa da birqatar sybaılas jemqorlyq qylmystaryn jasaǵan. Olardy biz qazir tekserip jatyrmyz. Osy adammen eńbek qatynastaryn ýaqtyly toqtatqan jaǵdaıda, memleketke zııan keltirý túrindegi saldarmen baılanysty jaǵdaıdy boldyrmaý múmkin edi. Bul turǵyda ótken jyldyń jeltoqsanynan bastap memlekettik jáne kvazımemlekettik sektor basshylarynyń qaramaǵyndaǵy qyzmetkerlerdiń sybaılas jemqorlyq quqyqbuzýshylyqtar jasaýynyń aldyn alý mindeti engizilgenin eske salǵan jón», - dedi A. Jarova onlaın brıfıngide.
Onyń aıtýynsha, kvazımemlekettik sektorda sybaılas jemqorlyq kórinisteriniń aldyn alý maqsatynda Agenttik korporatıvtik adaldyq standarttaryn saqtaýǵa jaýapty komplaens-qyzmetter ınstıtýtyn engizýge bastamashylyq jasady.
«Osy jyldyń 17 qazanynan bastap zańnamalyq deńgeıde mundaı ınstıtýt engizildi. Tıisti túzetýler «Sybaılas jemqorlyqqa qarsy is-qımyl týraly» Zańǵa engizildi. Kvazımemlekettik sektor úshin bul norma mindetti. Jeke kompanııalar ózderiniń qalaýy boıynsha komplaens-qyzmetter qura alady, mundaı quqyq olarǵa zańmen bekitilgen. «Samuryq-Qazyna «UÁQ» AQ, «Zerde» holdıngi, «QTJ» AQ sııaqty birqatar iri kompanııada buryn komplaens jumys istedi. Bizdiń ustanymymyz – kvazımemlekettik kompanııalarda komplaens-qyzmetterdiń qurylýy men tıimdi jumys isteýine qol jetkize otyryp, bul jumysty odan ári jalǵastyrý», - dedi A. Jarova.
Budan buryn habarlanǵandaı, QR Sybaılas jemqorlyqqa qarsy is-qımyl Agenttigi tóraǵasynyń keńesshisi Qazaqstanda jemqorlarǵa kvazımemlekettik sektorda jumys isteýge tyıym salynatynyn aıtty.
