Kvazımemlekettik sektor sýbektileriniń ekonomıkadaǵy rólin qaıta qaraý qajet - Godýnova

NUR-SULTAN. QazAqparat – Kvazımemlekettik sektor sýbektileriniń ekonomıkadaǵy rólin qaıta qaraý qajet. Bul týraly QR Parlamenti palatalarynyń birlesken otyrysynda Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnova aıtty, dep habarlaıdy QazAqparat tilshisi.

«Kvazımemlekettik sektorda júıeli problemalar bar. Bul másele Parlamentte jan-jaqty jáne birneshe márte talqylandy. «Samuryq-Qazyna» qorynyń ózin qospaǵanda, olardyń aktıvterin basqarýdyń aıtarlyqtaı jaqsarǵanyn ázirge aıta almaımyz. Bıyl Esep komıteti Prezıdent Ákimshiliginiń júıe quraýshy holdıngter men ulttyq kompanııalar qyzmetiniń tıimdiligine aýdıt júrgizý jónindegi tapsyrmasyn oryndaý jumystaryn aıaqtaıdy. Nátıjesi qandaı? Jalpyulttyq mindetterge qol jetkizýdegi árqaısysynyń rólin naqty anyqtaı otyryp, olardyń qyzmetin strategııalyq josparlaýdy jetildirý mańyzdy dep sanaımyz. Kvazımemlekettik sektor sýbektileriniń ekonomıkadaǵy rólin qaıta qaraý qajet. Olar paıda ákelip, jańa naryqtardyń ashylýyn týdyrýy kerek. Naryqtyq básekelestik qalyptasqan jerde tek qana jeke bıznes damýy tıis»,- dedi Natalıa Godýnova.

Sonymen qatar ol boryshtyq júktemege baqylaýdy kúsheıtý; dıvıdendtik saıasatty reglamentteý; satyp alýdy qatań baqylaý; korporatıvtik basqarýdy jetildirý; beıindi emes aktıvterden arylý, demek olardy kútip-ustaýǵa jumsalatyn qomaqty shyǵyndardy azaıtý syndy júıeli problemalardy sheshý qajettigin basa aıtty.

«Birqatar kompanııada mundaı jumys bastalyp ketti. Biraq keıbir normalardy zańnamalyq deńgeıde bekitý kerek», - dedi komıtet tóraıymy.