Kvartsqa naýqastardyń kózi kúıip qalǵan aýrýhanada medqyzmetkerler jazalandy
Eske salsaq, 26 qyrkúıek kúni áleýmettik jelide Jańaózen qalalyq ortalyq aýrýhanasynyń ınfektsııa bóliminde túsirilgen vıdeo tarady. Onda naýqas bala men onyń ápkesi jatqan palataǵa eskertýsiz kvarts qosylǵandyǵy, 45 mınýttan keıin olar kózderine shaǵymdana bastaǵany aıtylǵan. Jáne aýany zalalsyzdandyratyn qurylǵyny medbıkelerdiń nusqaýymen tazalyqqa jaýapty kishi medbıke qosqandyǵy atap ótiledi. Eki medbıkeniń óz kinálaryn moıyndap otyrǵany da túsirilgen.
Mańǵystaý oblystyq Densaýlyq saqtaý basqarmasynyń baspasóz qyzmeti usynǵan málimetke sáıkes, bul derek boıynsha aýrýhana basshysy M.Saryevtiń tóraǵalyǵymen otyrys ótken.
«Nátıjesinde, óz jumysyna nemquraıly qaraǵany úshin ınfektsııa bóliminiń meńgerýshisi A.Tabynbaevaǵa - «eskertý», aǵa medbıke I.Takenovaǵa «sógis» jarııalandy. Medbıke A.Kýshenova jáne kishi medbıke M.Jaıtanova óz erkimen jumystarynan bosatyldy. Qazirgi ýaqytta naýqastar úılerine qaıtyp, barlyq dári-dármekterin aldy. Naýqastyń úıine aýrýhana basshysynyń orynbasary R.Japparova bardy. Ol balany jáne onyń ápkesin qarap, óz baqylaýyna aldy», - dedi vedomstvodan.