Qazaqstanda qaldyqtardy energııaǵa aınaldyratyn jańa zaýyttar salynady
ASTANA. KAZINFORM — Ekologııa mınıstrligi qaldyqtardy energııaǵa aınaldyrý jobalaryn óńirlerge taratýdy josparlap otyr.
2025 jyly Astana, Almaty jáne Shymkent qalalarynda qaldyqtardy energetıkalyq kádege jaratý (elektr energııasyn óndire otyryp, qaldyqtardy termııalyq óńdeý) zaýyttaryn salý boıynsha Investıtsııalar týraly kelisimder jasaldy. Tikeleı kelissózder sheńberinde atalǵan jobalar úshin elektr energııasyna tarıf 1 kVt/saǵ úshin 55 teńge mólsherinde belgilendi.
Atalǵan tetikti engizýdiń maqsaty — qaldyqtardy kádege jaratý jáne qaıta óńdeý úlesin arttyrý, polıgondarǵa kómiletin qaldyqtar kólemin qysqartý, qaldyqtardy basqarý salasynyń ınvestıtsııalyq tartymdylyǵyn arttyrý, sondaı-aq qaldyqtardyń qorshaǵan ortaǵa teris áserin azaıtý.
Qazir qaldyqtardy energetıkalyq kádege jaratý jobalary Eýropanyń kóptegen elinde, sondaı-aq Koreıa, Qytaı Halyq Respýblıkasynda, Japonııada jáne basqa da memleketterde tabysty iske asyrylyp keledi jáne qaldyqtardy basqarýdyń zamanaýı júıesiniń mańyzdy quramdas bóligi sanalady.
Qazaqstan Respýblıkasynda iske asyrylatyn jobalar eń ozyq qoljetimdi tehnologııalardy qoldanýdy kózdeıdi jáne Eýropalyq Odaqtyń ónerkásiptik shyǵaryndylar jónindegi dırektıvasynyń talaptaryna sáıkes keledi. Bul atmosferalyq aýaǵa lastaýshy zattar shyǵaryndylaryn barynsha azaıtýdy jáne qatań ekologııalyq talaptardyń saqtalýyn qamtamasyz etedi.
— Qazir Ekologııa jáne tabıǵı resýrstar mınıstrligi oblys ortalyqtarynda osyndaı jobalardy iske asyrý maqsatynda áleýetti ınvestorlarmen tikeleı kelissózder júrgizý jáne uqsas sharttarmen Investıtsııalar týraly kelisimder jasasý múmkindigin qarastyryp jatyr. Mınıstrlik Qazaqstan aýmaǵynda qaldyqtardy energetıkalyq kádege jaratý jobalaryn iske asyrýǵa nıetti ári daıyn múddeli ınvestorlarmen ózara is-qımyl jasaýǵa jáne usynylatyn bastamalardy jan-jaqty pysyqtaýǵa daıyn ekenin bildiredi, — delingen habarlamada.
Óz kezeginde ınvestıtsııalar týraly kelisimderdi jasasý tártibi QR Syrtqy ister mınıstriniń mindetin atqarýshynyń 2023 jylǵy 17 naýryzdaǵy № 11-1-4/113 buıryǵymen retteledi.
Buǵan deıin qaıta óńdeýge 131 myń tonnadan astam qaldyq jiberilgenin jazǵanbyz.
