Kvadro jáne kartodromdar, kottedj qalashyǵy: Zerendide jańa nysandar ashylady
KÓKShETAÝ. QazAqparat - Aqmola oblysynyń Zerendi aýdanynda jazda 3 jańa nysan ashylady. Bul týraly aımaq basshysy Málik Myrzalınniń aýdanǵa jumys sapary barysynda aıtyldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Aımaq basshysy kýrortty óńirde týrıstik nysandardyń qurylysy jáne abattandyrý jumystarynyń barysymen tanysty. Bıylǵy jyly kýrortty óńirde qonaqúı naryǵynda úsh jańa týrıstik nysandy qoldanysqa berý josparlanyp otyr. Onyń biri 2 qabatty jazǵy bes úıshikten turatyn «Zerendi Park» qonaqúı kesheni. Onda demalýshylar úshin sporttyq jáne balalar alańy, otyratyn oryndar qarastyrylǵan. Oǵan qosa, aldaǵy ýaqytta 5 gektar aýmaqqa saıabaq, kvadro jáne kartodrom salý josparda bar.
Sonymen qatar, Zerendi kóliniń jaǵasynda jańadan salynǵan «Tamılla» demalý bazasy da paıdalanýǵa beriledi. Aǵashtan qashalyp salynǵan 2 qabatty 3 korpýstan turatyn nysanda 26 nomer, ashana jáne demalyp otyratyn oryndar qarastyrylǵan.
Al «Zeren»-de kottedj qalashyǵyn keńeıtip, aýqymdy sharalardy ótkizý úshin jazǵy alańnyń qurylysy josparlanyp otyr. Zerendiniń geografııalyq ereksheligi men tabıǵı landshaftynyń san-alýandyǵy týrızmniń birneshe túrin damytýǵa qolaıly.
Qazirgi kezde, munda jazǵy jáne qysqy týrızm qarqyndy damyp keledi. Týrıster men demalýshylarǵa 38-den astam nysan qyzmet kórsetedi.
Ótken jyly týrıstik nysandarda 100 myńǵa jýyq adamǵa qyzmet kórsetildi. Bul kórsetkish aldyńǵy jylmen salystyrǵanda 18,4 paıyzǵa joǵary. Qarjylaı alǵanda 2017 jyly 462,2 mıllıon teńge paıda tústi.
Zerendi aýdanynda týrızmdi damytý úshin jańadan salynyp jatqan «Şýchınsk-Zerendi» avtojoly serpin beretini sózsiz. Bul óz kezeginde shaǵyn jáne orta bıznesti damytyp, jańa jumys oryndaryn ashýǵa múmkindik beredi. Oǵan qosa, aýdanǵa týrısterdiń aǵynyn artyrady dep kútilýde.
Sapary sońynda Málik Myrzalın týrıstik bıznes ókilderimen Zerendi demalys aımaǵyn damytý máselelerin talqylady. Onda ınfraqurylymdy damytý, qyzmet aıasyn keńeıtý, attraktsıondary bar saıabaq pen sporttyń tehnıkalyq túrleriniń keshenin jáne jyl boıy qyzmet kórsetetin «Ystyq bulaq» ashyq aspan astyndaǵy basseınin salý, jumys istep turǵan týrıstik nysandarda emdeý sharalaryn ótkizýge jaǵdaı jasaý, demalýshylardyń qaýipsizdigi men týrıstik nysandarǵa sanat berýdi jáne qys aılarynda qyzmet kórsetýdi qamtamasyz etý máseleleri sóz boldy.
Aımaq basshysy óńirdiń sulý ári baı tabıǵatyna nazar aýdardy. Ásirese, Zerendiniń áleýeti joǵary týrıstik aımaq sanalatynyn aıta kele, Qazaqstan men taıaý jáne alys shetelderden keletin myńdaǵan týrısterge qyzmet kórsetýge múmkindigi zor ekenin atap ótti.
«Aqmola oblysynda týrısterdi Býrbaıdan basqa ásem tabıǵaty jáne baı tarıhymen tanymal Zerendi óńiri de qyzyqtyrady. Sol sebepti, zerendilikterdiń aldynda turǵan basty másele, ol týrıstik qyzmet sapasyn arttyrý», - dedi Málik Myrzalın jıynda sóılegen sózinde.
