Quzyrly organ aqmolalyq kompanııaǵa jarty jyldan astam ýaqyt akkredıtatsııa bermegen
Vedomstvonyń deregi boıynsha, «Kokshestroı Tehnadzor» JShS tehnıkalyq qadaǵalaý boıynsha ınjınırıng qyzmet kórsetý úshin 7 aı boıy akkredıtatsııa ala almaı júrgen, al Qurylys jáne turǵyn úı-kommýnaldyq sharýashylyq isteri komıteti bul sheshimdi túrli sebeptermen sozýǵa turysqan.
«Qarapaıym ǵana sharýanyń osynsha saǵyzdaı sozylatyn kútpegen «Kokshestroı Tehnadzor» JShS ókilderi amalsyzdan Aqmola oblysy boıynsha óńirlik kásipkerler palatasyna júgingen. «Kokshestroı Tehnadzor» JShS ókilderiniń aıtýynsha, 2018 jyldyń shilde aıynda kompanııa sol kezdegi QR Investıtsııalar jáne damý mınıstrligine qarasty (qazirgi kezde QR Indýstrııa jáne ınfraqurylymdy damytý mınıstrligi) Qurylys jáne turǵyn úı-kommýnaldyq sharýashylyq isteri komıtetine tehnıkalyq qadaǵalaý boıynsha ınjınırıngtik qyzmetti júzege asyrý quqyǵyn beretin akkredıtatsııa alý úshin ótinish bergen. Alaıda, memlekettik organ «Kokshestroı Tehnadzor» JShS bul ótinishin qabyl almaǵan.
Bekitilgen erejege saı saı akkredıtatsııa bergen kezdegi basty talap, uıym shtaty quramynda tehnıkalyq qadaǵalýdy júrgizetin attestatsııalaýdan ótken sarapshy sany úsh adamnan kem bolmaýy tıis. «Kokshestroı Tehnadzor» JShS bul talapqa saı keldi. Degenmen, Qurylys jáne turǵyn úı-kommýnaldyq sharýashylyq isteri komıtetiniń laýazymdy tulǵalarynyń pikiri boıynsha kompanııa usynǵan sarapshylardyń ekeýi ózge akkredıttelgen uıymmen eńbek shartynda turǵan», deıdi Aqmola oblysy boıynsha óńirlik kásipkerler palatasynyń baspasóz qyzmetindegiler.
Palata sarapshylary óz kezeginde Qurylys jáne turǵyn úı-kommýnaldyq sharýashylyq isteri komıtetine qujattar týraly keńeıtilgen málimet berdi. Onda attestatsııalaýdan ótken sarapshylardyń tek «Kokshestroı Tehnadzor» JShS shtatynda turǵany rastalyp otyr.
«Osyǵan baılanysty, palata ótken jyly eki ret (2018 jyldyń qarasha jáne jeltoqsan aılarynda) vedomstvoǵa joǵaryda aıtqan dálelderdi kórsetip, ótinish jasaǵan. Nátıjesinde ótken jyldyń 28 jeltoqsanynda ǵana Qurylys jáne turǵyn úı-kommýnaldyq sharýashylyq isteri komıteti qujattardy sońǵy ret qaraý barysynda akkredıtteý komıssııasynyń sheshimimen ótinish berýshi kompanııaǵa akkredıtatsııalanǵany týraly kýálik bergen. Bul ózgerister memlekettik organnyń saıtynda jarııalanǵan, akkredıtatsııalanǵan uıymdardyń tizilimine engizildi», dep tolyqtyrdy Aqmola oblysy boıynsha óńirlik kásipkerler palatasynyń baspasóz qyzmetindegiler.
«Kokshestroı Tehnadzor» JShS ókilderi akkredıtatsııalaý týraly kýáliktiń alǵanyn rastap, Aqmola oblysy boıynsha óńirlik kásipkerler palatasynyń sarapshylarynyń atyna Alǵys hat joldady.