Qujatyna jalǵan mór bastyryp alǵan 4 ózbekstandyq ustaldy

NUR-SULTAN. QazAqparat - Qazaqstan shekarashylary jalǵan mór basylǵan qujattarmen memlekettik shekaradan ótpek bolǵan tórt Ózbekstan azamatyn ustady, dep habarlaıdy QazAqparat shekara qyzmetine silteme jasap.

Jalǵan mórmen ustaý dereginiń birin «Astana» shekaralyq baqylaý jasaǵynyń shekarashylary júzege asyrdy. «Nur-Sultan-Tashkent» baǵytyndaǵy HY-722 áýe reısinen kóshi-qon polıtsııa bóliminiń jalǵan mórin basyp, tirkeýdi 2019 jyldyń 13 mamyryna deıin uzartyp alǵan 1996 jylǵy ózbekstandyq ustaldy.

«Eline qaıtyp bara jatqan taǵy úsh Ózbekstan azamaty Saryaǵash shekara jasaǵynyń «Jibek joly-avto» bólimshesinde qolǵa tústi. Olardyń qujattaryna Almaty oblysy boıynsha kóshi-qon polıtsııasynyń qoldan jasalǵan móri basylypty» delingen habarlamada.