Qujaty joq 16,5 myń adam ІІM-niń qabyldaý-taratý oryndaryna jetkizildi
ASTANA. QazAqparat - 2018 jyly Іshki ister mınıstrliginiń qabyldaý-taratý oryndaryna turǵylyqty jeri joq 16,5 myńǵa jýyq adam jetkizildi. Mundaı derekti Májilis depýtattarynyń resmı saýalyna jaýap bergen QR Premer-Mınıstri Baqytjan Saǵyntaev keltirdi, dep habarlaıdy QazAqparat tilshisi.
Úkimet basshysynyń atap ótýinshe, belgili bir turǵylyqty jeri, jeke basyn kýálandyratyn qujattary joq adamdardy sáıkestendirýdi ishki ister organdary qabyldaý-taratý oryndarynda ІІM-niń krımınalıstıkalyq daktıloskopııalyq esepke alýyn jáne Bas prokýratýranyń arnaıy esepke alýyn paıdalaný arqyly júrgizedi. Onyń barysynda azamattyń fotosýretteri, qol saýsaqtary men alaqan izderiniń bıometrııalyq derekteri engiziledi.
«Іshki ister mınıstrliginiń aqparaty boıynsha 2018 jyly qabyldaý-taratý oryndaryna turǵylyqty jeri joq shamamen 16,5 myń adam ornalastyrylǵan, olardyń 16,3 myńy sáıkestendirilgen. Jalpy, ómirde qıyn jaǵdaıǵa tap bolǵan azamattardyń áleýmettik problemalaryn sheshý jáne olarǵa memlekettik qyzmetter kórsetý máseleleri ishki ister, áleýmettik qorǵaý organdarynyń jáne ózge múddeli memlekettik mekemelerdiń udaıy baqylaýynda», - delingen Premer-Mınıstr jaýabynda.
