Qujatyn, bet-beınesin ózgertken: Aqmola oblysynda 26 jyl izdeýde bolǵan qylmysker ustaldy

KÓKShETAÝ. KAZINFORM - Aqmola oblysy aýmaǵynda 90 jyldary aýyr qylmystardy jasap, 26 jyl boıy izdeýde júrgen qylmystyń toptyń sońǵy múshesi qolǵa tústi. 

Oblystyq PD baspasóz qyzmetiniń málimetinshe, 6 adamnan turatyn qylmystyq top músheleri 4 adamdy óltirý, júrgizýshilerdi tonaý, ekonomıkalyq kontrabanda jáne bılik ókiliniń nemese laýazymdy tulǵanyń ataǵyn óz betinshe taǵaıyndaý tárizdi qylmys jasaǵan.

Qylmyskerlerge 26 jyl buryn izdeý jarııalandy. 1998 jyldary mılıtsııa qyzmetkerleriniń qyzmettik kıimin kıgen jáne avtomatty atys qarýymen qarýlanǵan qylmyskerler qala syrtyndaǵy avtojoldarda jezldiń (arnaıy taıaq) kómegimen avtokólikterdi toqtatyp, júrgizýshileri men jolaýshylaryn atyp, orman alqaptaryna denelerin kómip tastap otyrǵan. Al, avtokólikterin zańsyz satqan. 

«1999 jyly bandanyń 4 múshesin polıtsııa qyzmetkerleri ustady, bireýi kóz jumdy. Keıinnen sot úkimimen ustalǵan tórteýdiń ekeýi ólim jazasyna, ekeýi uzaq ýaqytqa bas bostandyǵynan aıyrý jazasyna kesildi. Al 26 jyl boıy polıtsııadan boı tasalap júrgen qylmystyq toptyń sońǵy múshesi 27 qańtarda Kókshetaýda qolǵa tústi. Ol óziniń tegin, atyn, ákesiniń atyn jáne týǵan jylyn zańsyz ózgertip alǵan. Tipti, bet-beınesin de ózgertken. Qazirgi ýaqytta qajetti tergeý rásimderi júrgizilip jatyr», - dedi vedomstvodan.

Aıta ketsek, budan buryn Aqmola oblysynda esirtki kýreri qolǵa túskenin jazǵan edik.