Kúzgi jıym-terimnen keıin órt qaýpin seıiltpeı tur – TJK
NUR-SULTAN. QazAqparat – QR ІІM TJK tóraǵasynyń orynbasary Barat Tuzaqbaev kúzgi jıym-terimnen keıin salǵyrttyq pen abaısyzdyqtyń saldarynan aýqymdy aýmaqtarda qurǵaq shóptiń órtenip jatqanyn málim etti, dep habarlaıdy QazAqparat tilshisi.
«Sońǵy kúnderi kún jyly bop tur. Saıajaıdaǵy adamdar, qojalyqtaǵy sharýalar bolsyn kúzgi baqshasy men eginin jınap alǵannan keıin kelesi jylǵa jerin daıyndaıtyny belgili. Sol kezde qalǵan sabanyn, shóbin jaǵyp jiberedi. Al dala jeldi bolsa, dál osyǵan kelgende órt qaýpiniń týyndaý yqtımaldyǵy artady. Aqyry, órt tutas aýqymdy aýmaqtardy alyp ketip jatqan jaǵdaılar kezdesýde. Mine, osyndaı qaýipterdiń aldyn alý úshin qazirgi ýaqytta nasıhat jumystaryn júrgizip jatyrmyz», - dedi ol elordada ótken baspasóz máslıhaty barysynda.
Komıtet ókiliniń aıtýynsha, 7 qazanda elimizdiń 4 óńirinde qurǵaq shóp janǵan. Atap aıtqanda, keshe túste Qaraǵandy qalasyndaǵy Qazybek bı aýdany «Mır» jáne «Lých» saıajaı qoǵamdarynyń aýmaǵynda qoqystar, aǵash dýal órtenip, qyzyl jalyn aqyry 45 saıajaı ýchaskesindegi qurǵaq shópke ulasqan. «Órttiń sebebi – salǵyrttyq» deıdi komıtet ókili. Der kezinde qolǵa alynǵan sharalardyń arqasynda tilsiz jaý der kezinde aýyzdyqtalǵan. Sol sekildi, saǵat 13:33-te BQO Oral qalasy Jelaev kentinde qurǵaq shóp janyp, órt Terekti aýdany Áıtıev aýylyndaǵy jáne Báıterek aýdany Jaıyq-2 aýylyndaǵy orman alqabyna ulasqan.
Saǵat 14:50-de Báıterek aýdanynda Ozernyı kentinen 21 shaqyrym jerde qurǵaq shóp, butalar men orman alqaby órtenip, jergilikti atqarýshy organdardyń kúshimen Sholpan aýylynan Rýbejka aýylyna 30 adam evakýatsııalanǵan. Órt 8 qazanda saǵat 11:01-de aýyzdyqtalyp, órtti sóndirýge TJD, PD, Orman sharýashylyǵy, EÓQ (barlyǵy 107 qyzmetker men 17 birlik tehnıka) jumyldyrylǵan.
Sonymen birge, saǵat 14:06-da Aqmola oblysynyń Býrabaı aýdanynyń Naýryzbaı batyr aýylynda 42 ga alqapta qurǵaq shóptiń janǵany habarlanyp otyr. Odan bólek, ShQO Kúrshim aýdanynyń Boran aýyldyq okrýgindegi Jıdeli aýylynda 180 ga alqapta qurǵaq shóp, sonymen qatar 22 tonna kóleminde daıyndalǵan shóp órtenip ketken. Órt búgin tańerteń saǵat 06:50-de ǵana aýyzdyqtalǵan.
