Kúzgi maýsymda 6 myńnan astam qazaqstandyq áskerge shaqyryldy
Bul jóninde QR Qorǵanys mınıstrliginiń «QazAqparat» agenttiginiń resmı saýalyna bergen jaýabynda málim etildi.
«1 qazannan bastap, áskerı bólimshelerdi jáne Qarýly kúshter mekemelerin, ózge de áskerler men Qazaqstandaǵy áskerı qurylymdardy jas sarbazdarmen tolyqtyrý maqsatynda merzimdik áskerge shaqyrý komıssııalarynyń jumysy bastaldy. Jalpy Qarýly kúshterge, ózge áskerlerge jáne Qazaqstannyń basqa da kúshtik qurylymdaryna kúzgi shaqyrý kampanııasy kezinde medıtsınalyq komıssııamen áskerge jaramdy dep tanylǵan 6 myńnan astam qazaqstandyq áskerge shaqyryldy», - delingen resmı jaýapta.
2016 jyly áskerge 1989-1998 jyldary týǵan azamattar shaqyrylǵan. Áskerı bólimshelerge irikteý barysynda olardyń áskerden buryn alǵan mamandyqtary eskeriletin bolady.
Aǵymdaǵy jyldyń kúzgi shaqyrylymyna túsken qazaqstandyqtar aldymen QR Ulttyq qaýipsizdik komıtetiniń shekara qyzmetine, QR Memlekettik qorǵanys qyzmetine, sosyn QR Qarýly kúshterine jáne QR Ulttyq Ulanyna baǵyttalady.
«Qazirgi ýaqytta jańadan qalyptastyrylyp jatqan áskerı lektiń densaýlyq jaǵdaılarynyń kórsetkishteri edáýir jaqsy. Kúzgi shaqyrylym nátıjeleri 2017 jyldyń basynda belgili bolady», - dep jazady QR Qorǵanys mınıstrligi.
Aıta keteıik, bunyń aldynda QR Qorǵanys mınıstrligi Qarýly kúshter júıesinde jemqorlyqtyń basym deni áskerı bıletti berý kezinde oryn alatyndyǵyn habarlaǵan bolatyn.
