Kúzgi egin oraǵyna daıyndyq qalaı júrip jatyr
KÓKShETAÝ. QazAqparat - Agroónerkásip kesheni oblys ekonomıkasynyń eń mańyzdy salalarynyń biri bolyp sanalady. Byltyrǵy jyly uıymshyldyq kórsetip, el Táýelsizdiginiń 25 jyldyǵyn joǵary deńgeıde qarsy alǵan Aqmola oblysynyń dıqandary bıylda sol úrdisten shyǵýdy kózdep otyr. Bul týraly QazAqparat tilshisine Aqmola oblystyq aýyl sharýashylyǵy basqarmasynyń bólim basshysy Seıilhan Ysqaqov aıtyp berdi.
Onyń sózine qaraǵanda, bıylǵy jyly aýa raıynyń qolaısyzdyǵy astyqtyń shyǵýy men pisip-jetilýine biraz keri áser etken jaıy bar. Degenmen, dıqandardyń tynymsyz eńbegi men qazirgi zamanǵy tehnologııany qoldaný jáne kóktemgi dán sińirý jumystarynyń ýaqtyly júrgizilýiniń arqasynda gektar túsimi jaman bolmaıtyn kórinedi. Eń bastysy, bar altyn astyqty kúzgi-jaýyn shashynǵa qaldyrmaı der kezinde jınap alý bolyp otyr.
«Astyq túsimi mol bolýy bul azyq-túlikke, tuqym jáne jemge degen ishki naryqtaǵy suranysty tolyqtaı qamtamasyz etýge, aýyl sharýashylyǵy salasynyń eksporttyq áleýetin kóterýge múmkindik beredi. Qaı jyldy alsaq ta, egin oraǵyn ótkizý ońaıǵa soqpaıtyny anyq. Sondyqtan oraq naýqanyn tıisti agrotehnıkalyq deńgeıde jáne barynsha qysqa merzimde ótkizý úshin egin orý jumystarynyń strategııasy men taktıkasyn aldyn ala talqylaǵan jón», - deıdi S.Ysqaqov.
Osy oraıda, bólim basshysy óńirde kúzgi oraqqa tehnıkalardy daıyndaý jumystary da oıdaǵydaı júrgizilip jatqanyn atap ótýde.
«Bıylǵy naýqanǵa 8668 astyq kombaıny jumyldyrylady dep josparlanǵan, onyń 3 myńy alymdyǵy joǵary sheteldik tehnıka bolyp otyr. Bul tehnıkanyń qazir 100 paıyzyna jýyǵy daıyn. Al, shalǵyǵa keletin bolsaq, oblysta onyń sany 2466, ıaǵnı, 100 paıyzy, júk kóligi jáne traktor tirkemesiniń 100 paıyzy jumysqa ázir», - deıdi bólim basshysy.
Sonymen qatar, oblys aýmaǵynda sharýalardy janar-jaǵar maıymen qamtamasyz etý, mehanıkalandyrylǵan qyrman, avto-júk tarazylary jáne astyq keptirý oryndarynyń da daıyndyǵy pysyqtalýda.
«Óńirde elevatorlar men astyq qabyldaý kásiporyndarynyń syıymdylyǵyn ulǵaıtý nemese jańadan salý sııaqty jumystar da udaıy nazarda. Janar-jaǵarmaımen qamtamasyz etý máselesi de oń sheshilýde. Kúzgi egin oraǵyn oıdaǵydaı ótkizý úshin 75,9 myń tonna kóleminde dızel otyny, 4,7 myń tonna dızel maıy jáne 6,9 myń tonna benzın qajet. Búgingi tańda qajetti janar-jaǵarmaıdan 40 myń tonna kóleminde dızel otyny, 4,7 myń tonna dızel maıy jáne 6,9 myń tonna benzın qory jasaldy. Oblysqa naýqanǵa qajetti kepildendirilgen dızel otynynyń 75 myń tonnasy bólingen.
Egin oraǵy kezindegi eń basty másele ol astyq qabyldaý kásiporyndarynyń daıyndyǵy. Osy oraıda, bıylǵy naýqanǵa 229 astyq keptirý kásiporny men 487 mehanıkalandyrylǵan qyrman jumyldyrylatyn bolady», - deıdi Seıilhan Ysqaqov.
