Kúzge qaraı mádenıet jáne arhıv mamandarynyń aılyǵy ósýi múmkin

NUR-SULTAN. QazAqparat – Bıyl kúzde mádenıet jáne arhıv salasynyń barlyq deńgeıdegi qyzmetkerleriniń aılyǵy ósýi múmkin. Mádenıet jáne sport mınıstri Aqtoty Raıymqulova ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Sońǵy 12 jylda mádenıet salasynda, ásirese oblystyq deńgeıdegi mádenıet, óner, mýzeı qyzmetkerleriniń eńbekaqysy óspegen bolatyn. 2020 jyldyń qańtarynda mádenıet pen arhıv salasyndaǵy respýblıkalyq uıym qyzmetkerleriniń aılyǵy 50 paıyzǵa, jergilikti deńgeıdegi qyzmetkerlerdiń aılyǵy 35 paıyzǵa kóbeıtilgen bolatyn», - degen sala jetekshisi bıylǵy josparǵa pandemııanyń keri áser etip jatqanyn jetkizdi.

«2020-2021 jyldarda pandemııaǵa baılanysty bıýdjet shyǵyndar qaıta-qaıta túzetilip jatyr. Bıyl kúzde eldegi epıdemıologııalyq jaǵdaı túzelse Qarjy mınıstrligi biz bergen ótinimdi maquldaıdy dep oılaımyz. Negizinde Úkimet mádenıet pen arhıv salasyndaǵy barlyq deńgeıdegi qyzmetkerlerdiń aılyǵyn kóbeıtý týraly bastamamyzdy qoldap otyr. Kúzde kezekti ósim bolady dep oılaımyn», - deıdi Aqtoty Raıymqulova.

Mınıstr bıyl eki teatrǵa akademııalyq mártebe, 5 uıymǵa ulttyq mádenıet nysan ataǵy berilgenin eske salyp, sonyń arqasynda atalǵan nysandardaǵy qyzmetkerlerdiń aılyǵy ósetinin málim etti.

«Mádenıet uıymdarynda aılyqpen birge baspana máselesi de ózekti. Qazaqstan ıopetekalyq kompanııasymen memorandýmǵa qol qoıǵan bolatynbyz. Sonyń aıasynda 2020 jyldan bastap páterler bere bastadyq. Bıyl da, aldaǵy jyly da bul jumys jalǵasady», - dedi Mádenıet jáne sport mınıstri.