Kúzge qaraı ınflıatsııa bola ma
ASTANA. KAZINFORM – Ulttyq bank tóraǵasy Tımýr Súleımenov bazalyq mólsherlemeni aıqyndaý máselesine arnalǵan kezekti baspasóz máslıhatynda kúzge qaraı Qazaqstanda ınflıatsııa bolýy múmkin degenge saıatyn boljamdarǵa jaýap berdi.
- Ulttyq bank valıýta baǵamy boıynsha boljamdy usynbaıdy. Qarjy naryǵy men aqsha-nesıe saıasatyn retteýshi bolǵandyqtan ondaı sandardy aıta almaımyz. Devalvatsııanyń yqtımaldyǵyna kelsek, ókinishke qaraı, serpindi devalvatsııalar jınaqtalyp kelip, bir kúni valıýta baǵamyn ózgertip jiberedi degen túsinik qalyptasqan. Árıne, olaı bolýy múmkin emes. Óıtkeni ınflıatsııany erkin baǵam aǵysymen targettep otyrmyz. Biz buǵan deıin de baǵamnyń qalaı qozǵalǵanyn, biraq serpinmen ósip ketkenin kórgen joqpyz. ıAǵnı, valıýtanyń teńgege shaqqandaǵy baǵamy syrtqy jáne ishki faktorlardyń qysymymen artýy da múmkin, álsireýi de múmkin, - dedi ol jýrnalıst suraǵyna jaýap bere otyryp.
Tımýr Súleımenov eldegi devalvatsııanyń yqtımaldyǵyna eksport múmkindikterinen bólek ımporttyń kólemi de áser etetinin eske saldy.
- Árıne, biz úshin valıýta baǵamyndaǵy negizgi faktor munaı baǵasy ekenin aıqyn. Eger munaı baǵasy uzaq ýaqyt boıy tómen kúıinde tursa, Qazaqstannyń eksport múmkindikterine, tólem balansyna, ishki naryqtaǵy dollardyń kólemine, áser etýi múmkin. Onyń bári teńgeniń baǵamyna áser etedi. Al munaı men ózge de eksport taýarlarynyń baǵasy bizge ońtaıly deńgeıde qalsa, sonymen birge ımport kólemi azaısa, jaǵdaı áldeqaıda turaqty bolatyny túsinikti. Sondyqtan álemdik qarjy jáne energetıka naryǵynda ne bolatynyn aıta alatyn bir de bir ekonomıst joq dep oılaımyn. Óıtkeni belgisizdik kóp, - dedi Ulttyq bank tóraǵasy.
Sondaı-aq, ol Ulttyq bank pen Ulttyq ekonomıka mınıstrliginiń sarapshylary álemdegi ekonomıkalyq básekeniń saldaryn eseptep jatqanyn aıtty.
- AQSh-tan keletin aqparattardy da esepke alyp otyrmyz. Ulttyq ekonomıka mınıstrligindegi áriptesterimiz ben bizdiń boljaýshylar eseptep jatyr. Búgin tańǵy saǵat 9.00-de Premer-mınıstr osy másele boıynsha májilis ótkizdi. Biz qandaı da bir baıbalam men dúrbeleńge negiz bolatyndaı úlken sebep kórip otyrǵan joqpyz. Ekonomıkalyq ósim de, memlekettik qarjynyń kórsetkishteri boljamdy shekterdiń deńgeıinde qalyp otyr. Ahýal Qazaqstanǵa ǵana baılanysty emes, álemdik qarjy jáne energetıka naryǵyndaǵy oqıǵalarǵa da baılanysty, - dedi Tımýr Súleımenov.
Aıta keteıik, búgin Ulttyq bank bazalyq mólsherleme týraly jańa sheshim qabyldady.