Kúzgi-qysqy ańshylyq maýsymy bastalady: neni este ustaý qajet

PETROPAVL. KAZINFORM – Soltústik Qazaqstan oblysynda kúzgi-qysqy ańshylyq maýsymy 30 tamyzda resmı túrde ashylady. 

Ańshylyq – jaı ǵana hobbı emes, úlken jaýapkershilik pen zańǵa baǵynýdy talap etetin áreket. Biraq bul ispen aınalysý úshin arnaıy qujattar men ruqsattar qajet.

SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, áýesqoı ańshyda ańshy kýáligi;

janýarlar dúnıesin paıdalanýǵa arnalǵan ruqsat;

ańshylyq sharýashylyǵy sýbektisiniń joldamasy;

eger atys qarýy qoldanylsa – ishki ister organdarynyń qarýdy saqtaý jáne alyp júrýge bergen ruqsaty;

jyrtqysh qustarmen ań aýlasa – olardy tirkeý týraly resmı qujattar bolýy qajet. 

Qazirgi ýaqytta elik, maral erkegin atýǵa ruqsat bar. Áýesqoı ańshylar 30 tamyz – 30 qarasha aralyǵynda qaz, úırek, qasqaldaqqa, qyrkúıektiń 1-inen borsyqqa, qyrkúıektiń birinshi senbisinen qabanǵa ańshylyqqa shyǵa alady. Borsyqty 15 qarashaǵa deıin, qabandy 31 jeltoqsanǵa deıin aýlaýǵa ruqsat. 

Al 6 qyrkúıek – 30 qarasha aralyǵynda kekilikti, 15 qyrkúıek pen 30 qarasha aralyǵynda qaraquıryqty, jas, urǵashy tuıaqty janýarlardy 15 qyrkúıek – 31 jeltoqsan aralyǵynda jáne qarsaq, túlki, qoıandy 1 qarasha – 15 aqpan aralyǵynda atýǵa bolady. 

Mamandardyń aıtýynsha, ań aýlaý barysynda tek ruqsattamada kórsetilgen janýarlardy ǵana atýǵa bolady jáne sany da shekteledi.

Tuıaqty janýarlardy aýlaý tek ormanshy nemese memlekettik ınspektordyń qatysýymen ǵana júrgizilýi tıis.

Ańshy ár ańshylyq kúni aıaqtalǵan soń nemese ornyn aýystyrǵanda arnaıy belgi qoıýy kerek. Tuıaqtylar boıynsha bul belgi janýardy atyp alǵannan keıin birden qoıylady.

Buǵan deıin SQO-da bıyl 200 mln teńgege turǵyndarǵa qymbat ota jasalǵanyn jazǵan edik.