Kúzgi áskerge shaqyrý: 22 myń jas otan aldyndaǵy boryshyn óteıdi

ASTANA. KAZINFORM — Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev bıyl kúzgi áskerı shaqyrý qansha jasty qamtıtynyn aıtty. 

— Prezıdenttiń Jarlyǵyna sáıkes qyrkúıek aıynan bastap jergilikti atqarýshy organ ákimderi orynbasarlarynyń basshylyq etýimen 195 qalalyq jáne aýdandyq áskerge shaqyrý komıssııasy azamattardy kúzgi merzimdi áskerı qyzmetke shaqyrýǵa kiristi.

Jeltoqsan aıynyń 30-yna deıin Qarýly Kúshterdiń, basqa da ásker men áskerı quralymdardyń qataryn áskerge shaqyrýdy keıinge qaldyrýǵa nemese odan bosatýǵa negizi joq, 18-den 27 jasqa deıingi 22 myńǵa jýyq er azamat tolyqtyrady, — dedi ol ortalyq kommýnıkatsııalar qyzmetinde ótken baspasóz máslıhatynda.

Qorǵanys mınıstrliginiń dereginshe, áskerge shaqyrýǵa jatatyn jastardyń sany — 21 968 adam. Sonyń ishinde:

Qarýly Kúshterge — 11 521 adam;

Ulttyq ulanǵa– 7 053 adam;

UQK Shekara qyzmetine– 2 700 adam;

TJ mınıstrligine– 404 adam;

Memlekettik kúzet qyzmetine — 290 adam alynbaq.

Buǵan deıin 28 tamyzda Qazaqstanda resmı túrde kúzgi áskerge shaqyrý naýqany bastalǵanyn jazǵan edik.