Kúzetshini pyshaqtaǵan: Aǵaıyndylar elordadaǵy qurylys alańyna urlyqqa túsken
NUR-SULTAN. QazAqparat – Elordada salynyp jatqan kólik jýý ortalyǵynyń kúzetshisin soqqyǵa jyǵyp, 2 mln teńgeniń qurylys materıaldaryn urlap ketken kúdiktiler ustaldy, dep habarlaıdy QazAqparat tilshisi.
Nur-Sultan qalalyq Polıtsııa departamentiniń málimetinshe, keshkisin qurylys nysanyn kúzetý kezekshiligine túsken 33 jastaǵy elorda turǵyny tańǵy saǵat 05.30 shamasynda kósheden bógde dybysty estıdi. Esikti asha bergen sátinde belgisiz bireýler soqqy jasap, odan keıin basyna tsementten bosaǵan qap kıgizgen. Qaraqshylar kúzetshini bólmege súırep ákelip, qoly men aıaǵyn baılap tastaıdy. Qarsylyq tanytpaq bolǵan oǵan qylmyskerler pyshaq suǵyp, esinen tanǵansha temirmen urǵan. Es-tússiz jatqan adamdy tańerteń jumysqa kelgen qurylysshylar taýyp alady.
«Qurylys alańynan jalpy quny 2 mln teńge bolatyn taýarlyq-materıaldyq qundylyqtar men kúzetshiniń jeke zattary urlanǵany anyqtaldy. Urlanǵan zattardy esh kedergisiz alyp ketýge qurylys alańynda qaýipsizdik júıesiniń joqtyǵy jol bergen. Polıtsııa qyzmetkerleri jedel-izdestirý sharalarynyń barysynda qaraqshylyq shabýyl jasaǵan kúdiktiler anyqtalyp, ustaldy. Olar buǵan deıin birneshe ret sottalǵan 42 jáne 34 jastaǵy aǵaıyndylar bolyp shyqty. Aǵaıyndylar qurylys alańynan urlanǵan taýarlyq-materıaldyq qundylyqtardy Qosshy aýylyna jetkizip úlgergen. Olar materıaldardy sol jerde satýdy josparlaǵan. Kúdiktilerdi polıtsııa qyzmetkerleri qylmys jasalǵannan keıin birneshe saǵattyń ishinde ustady. Zattaı aıǵaqtar tárkilendi. Kúdiktiler ýaqytsha oqshaýlaǵyshqa qamaldy. Atalǵan fakti boıynsha QR QK 192-babymen qylmystyq is qozǵaldy. Tergeý júrgizilip jatyr», - dedi vedomstvodan.
