Kúzetpen ustaý merzimin uzartý aldyn ala sheshilýge tıis — Konstıtýtsııalyq Sot
ASTANA. KAZINFORM — Konstıtýtsııalyq Sot adamnyń jeke bas bostandyǵyn qorǵaý maqsatynda kúzetpen ustaý merzimderine qatysty mańyzdy qaýly qabyldady. Bul týraly Bas prokýratýra málim etti.
— 2026 jylǵy 10 maýsymda Konstıtýtsııalyq Sot adamnyń jeke bas bostandyǵyna qatysty kelesi mańyzdy qaǵıdatty rastady: eshkim zańda jáne sot sheshiminde belgilengen merzimnen artyq kúzetpen ustalmaýǵa tıis, — delingen habarlamada.
Konstıtýtsııalyq is júrgizýge sot talqylaýy barysynda kúzetpen ustaý túrindegi bultartpaý sharasyn qoldanýǵa baılanysty máselelerge nazar aýdarǵan azamattardyń ótinishteri negiz boldy.
Konstıtýtsııalyq Sot adam zań men sot sheshimi negizinde ǵana kúzetpen ustalýy múmkin ekenin eske saldy. Bul — konstıtýtsııalyq kepildikterdiń eń negizgileriniń biri.
— Іsti qaraý barysynda Konstıtýtsııalyq Sot Qylmystyq-protsestik kodekstiń 342-babynda adamnyń kúzetpen ustaý merzimin uzartý máselesi buryn belgilengen merzim aıaqtalǵannan keıin sheshilýi múmkin degen túsinik qalyptastyrýǵa jol beretin quqyqtyq olqylyq bar ekenin anyqtady, — delingen prokýranyń habarlamasynda.
Іs júzinde bul adamnyń aldyńǵy sot sheshimimen belgilengen merzim aıaqtalǵanyna qaramastan kúzette qalý qaýpin týyndatatyn.
Konstıtýtsııalyq Sot sot sheshiminsiz adamdy tipti qysqa merzimge bolsa da kúzette ustaýǵa jol berilmeıtinin jáne mundaı jaǵdaı Konstıtýtsııa talaptaryna qaıshy keletinin atap ótti.
Osyǵan baılanysty Sot atalǵan normanyń «osy baptyń ekinshi bóliginde kórsetilgen merzim ótkennen keıin» degen sózderin Konstıtýtsııaǵa sáıkes kelmeıdi dep tanydy jáne kúzette ustaý merzimin uzartý máselesi qoldanystaǵy merzim aıaqtalǵanǵa deıin aldyn ala sheshilýge tıis ekenin kórsetti.
Sonymen qatar Konstıtýtsııalyq Sot taǵy bir mańyzdy máselege nazar aýdardy. Aýyr qylmystar týraly ister boıynsha zańda sot talqylaýy kezeńinde sottalýshyny qamaýda ustaýdyń shekti merzimi belgilengen. Ol — on eki aı.
Sot bul eń uzaq merzim aıaqtalǵannan keıin adamdy sol qylmystyq is boıynsha qaıtadan kúzetke alýǵa bolmaıtynyn túsindirdi.
Basqasha aıtqanda, zańda belgilengen eń joǵary merzim túpkilikti bolyp tabylady.
Qaýlynyń negizgi máni — adamnyń jeke basynyń bostandyǵyna quqyǵy zańmen senimdi qorǵalýǵa tıis. Memlekettik organdar men sottar adamnyń bas bostandyǵyn shekteý merzimderin buljytpaı saqtaýǵa mindetti.
