Kúzet uıymdarynyń mindetine antıterror qyzmeti qosylady - UQK

ASTANA. QazAqparat - Qazaqstan boıynsha kúzet uıymdarynyń mindetine terrorızmge qarsy tótep berý fýnktsııasy engiziledi. Arnaıy qurylǵan jumys toby tıisti zań jobasyn ázirledi, dep habarlady búgin Úkimet otyrysy barysynda Ulttyq qaýipsizdik komıtetiniń tóraǵasy Vladımır Jumaqanov.

«Terrorızmge qatysty nysandardy qorǵaý jónindegi zań jobasyn jetildirý aıasynda,  kúzet uıymdary ózderi kúzetetin nysandy terrorızmnen qorǵaýǵa mindetti sýbektilerdiń qataryna qosylady. Terrorızmge qarsy zańnamany oryndaýdan jaltarsa, ol kúzet uıymynyń qyzmeti toqtatylady»,-dep habarlady Úkimet otyrysynda baıandama jasaǵan V.Jumaqanov.

 Buǵan deıin habarlaǵanymyzdaı, ekstremızm jáne terrorızmmen kúres máseleleri  jónindegi keıbir zańnamalyq aktilerge ishinara ózgerister men tolyqtyrýlar engizý týraly zań jobasy alty kodeks pen birqatar baǵyttaǵy 18 zańǵa túzetý engizýdi kózdeıdi.