Kúzet uıymdary mektepterdegi qaýipsizdikti tolyq qamtamasyz ete alady - sarapshy

NUR-SULTAN. QazAqparat – Elimizdegi kúzet uıymdary barlyq mekteptegi qaýipsizdikti tolyq qamtamasyz ete alady. Mundaı pikirdi Nur-Sultan qalasyndaǵy kúzet uıymdary qaýymdastyǵynyń ókili Aleksandr Sosorbarmaev bildirdi, dep habarlaıdy QazAqparat tilshisi.

Onyń atap ótýinshe, mektepter oryn alýy múmkin lańkestik shabýyldar kezinde óte álsiz nysandar sanalady. Sondyqtan mundaı nysandardy qaýipsizdikti qamtamasyz etý máselesine beıimdelgen kásibı mamandar jumys isteýi tıis.

«Nege olaı bolmasqa, solaı bolýy tıis qoı. Óıtkeni, olar lańkestikke qarsy turǵydan alyp qaraǵanda óte álsiz nysandardyń tizimine kiredi», - dedi Aleksandr Sosorbarmaev.

Sarapshynyń paıymynsha, respýblıkamyzda kásibı kúzet uıymdarynyń jelisi barynsha damyǵan ári olar dál osy máselede bilim berý uıymdarynyń qaýipsizdigin tolyqtaı qamtamasyz etýge qaýqarly.

«Uıymdar jetkilikti deńgeıde damyǵan. Barlyǵy da tenderdiń qalaı ótkiziletindigine baılanysty bolyp tur. Tender ashyq ári ádil ótkizilýi tıis», - dedi ol.

Esterińizge sala keteıik, búgin Úkimet otyrysynda QR Premer-Mınıstri Asqar Mamın 10 shildege deıin «Bilim berý uıymdarynda balalardyń qaýipsizdigin qamtamasyz etý jónindegi jol kartasyn» bekitýdi tapsyrǵan bolatyn.

«Óńirlerdiń ákimdikteri jańa oqý jyly bastalǵansha bilim berý uıymdaryn qaýipsizdiktiń materıaldyq-tehnıkalyq quraldarymen qamtamasyz etsin. Bul ishki ister organdarynyń jedel den qoıý ortalyǵyna shyǵatyn beınebaqylaý júıelerin jańartýǵa, kásibı kúzetpen, týrnıkettermen jáne «dabyl túımelerimen» qamtamasyz etýge qatysty. Ekinshi, Bilim mınıstrligi múddeli memlekettik organdarmen birge bıylǵy 10 shildege deıin Bilim berý uıymdarynda balalardyń qaýipsizdigin qamtamasyz etý jónindegi jol kartasyn bekitsin», - degen edi Úkimet basshysy.