Kúzdiń alǵashqy kúnderi kún sýytyp, jańbyr jaýady - Qazgıdromet
NUR-SULTAN. QazAqparat - Sınoptıkter 3-5 qyrkúıek kúnderine arnalǵan aýa raıy boljamyn jarııalady, dep habarlaıdy QazAqparat «Qazgıdromet» RMK baspasóz qyzmetine silteme jasap.
Qazaqstannyń soltústik jartysyna jańbyr men sýyqty ala kelgen tsıklon aldaǵy úsh táýlikte de respýblıkanyń batys, soltústik jáne ortalyq oblystaryna óz yqpalyn tıgizedi. Al tsıklonǵa baılanysty sýyq atmosferalyq fronttar ońtústik, sodan soń ońtústik-shyǵys jáne shyǵys oblystarǵa qaraı jyljıdy. Tsıklon jáne fronttardyń áserinen respýblıka boıynsha jańbyr jaýyp, naızaǵaı oınaıdy. Ońtústik oblystarda temperatýra tómendep, al soltústik oblystarda aýa temperatýrasy klımattyq normadan 3-6°S tómen bolady.
Qazaqstannyń batys, soltústik jáne ortalyq óńirleriniń jekelegen aýdandarynda túngi ýaqyttarda 1...3°S úsik júrýi múmkin.
