Kúzden kóktemge deıin elektr energııasy tapshylyǵy aıyna 330 mln kVt/saǵatqa jetýi múmkin
ASTANA. KAZINFORM — Elimizde 2025 jyldyń qazanynan keler jyldyń naýryzyna deıin elektr energııasy tapshylyǵy aıyna 330 mln kVt/saǵatqa jetýi múmkin. Bul týraly «KEGOC» AQ basqarma tóraǵasy Nábı Aıtjanov aıtty.
— Kúzgi-qysqy kezeńge daıyndyq aıasynda júıelik operator aldaǵy kúzgi-qysqy kezeńge arnalǵan elektr energııasy men qýattyń boljamdy teńgerimderin ázirledi. Ázirlengen teńgerimderge sáıkes, 2025 jylǵy qazannan bastap 2026 jylǵy naýryzǵa deıingi kezeńde elektr energııasy men qýat boıynsha tapshylyq kútiledi. Boljam boıynsha elektr júktemesiniń eń joǵary mólsheri 17,6 GVt. Al elektr stansalaryndaǵy generatsııa kólemi shamamen 16,7 GVt deńgeıinde bolady. Qýat tapshylyǵy 0,9 GVt kóleminde boljanyp otyr, — dedi kompanııa basshysy «Samuryq-Qazyna» AQ qoǵamdyq keńesiniń otyrysynda.
Onyń dereginshe, aı saıynǵy elektr energııasy tapshylyǵy 125 mln kVt/saǵattan 330 mln kVt/saǵatqa deıin bolýy múmkin. Kúzgi-qysqy kezeń boıyndaǵy jalpy elektr energııasy tapshylyǵy 1,0 mlrd kVt/saǵattan asýy yqtımal.
— Elektr energııasy men qýat tapshylyǵy kórshiles energııa júıelerinen, atap aıtqanda Reseı Federatsııasy men Ózbekstannan elektr energııasyn josparly ımporttaý esebinen óteletin bolady, — dedi ol.
Aıta ketelik buǵan deıin Almaty jylý elektr ortalyqtary qashan gazǵa kóshiriletini týraly jazǵan edik.