Kúzde jyldaǵydaı kómir tapshylyǵy bolmaýy tıis – ShQO ákimi

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov kómir tapshylyǵyn boldyrmas úshin qazirden bastap daıyndalýdy tapsyrdy, dep habarlaıdy QazAqparat tilshisi.

Jyl saıyn kúz kelgende óńir turǵyndary arasynda kómir alý álegi bastalady. Ásirese, Óskemende kómir satylatyn núktelerde uzyn-sonar kezek qalyptasady. Oblys ákimdiginde ótken jınalys barysynda aımaq basshysy Danıal Ahmetov bul máseleni sheshý qajettigi jaıly aıtty.

«Kómir satyp alýǵa qazirden bastap kirisý kerek. Tuıyq joldarǵa kómir jetkizýdiń naqty kestesi bekitilýi tıis. Búginde Óskemendegi qoımalarda 5 tonna kómir qory bar. Barlyq áleýmettik nysanǵa, ıaǵnı mektepter, aýrýhanalar men qazandyqtarǵa qazirdiń ózinde kómir satyp alynýy qajet. Tıisti qarajat bólinip te qoıǵan», - dedi ákim.

Aıtýynsha, qala men aýdan ákimderiniń birinshi kezektegi mindeti – kómir tuıyqtarynyń jaǵdaıyn tekserý.

«Bul másele únemi óz baqylaýymda bolady. Tamyz aıynda oblystaǵy barlyq áleýmettik nysan kómirmen qamtamasyz etilýi tıis», - dedi Danıal Ahmetov.