Kúzde «Jumyspen qamtý-2020» baǵdarlamasy boıynsha aýyldaǵy nysandardy jóndeý jumystary aıaqtalady

ASTANA. 17 tamyz. QazAqparat - «Jumyspen qamtý-2020» baǵdarlamasy boıynsha aýyldaǵy ınfraqurylym jáne áleýmettik nysandardy jóndeýdiń ústimizdegi jylǵa josparlanǵan  jumystary kúzde aıaqtalady, dep habarlady QR Eńbek jáne halyqty áleýmettik qorǵaý mınıstrligi Halyqty jumyspen qamtý departamentiniń dırektory  Dáýlet Arǵandyqov pm.kz saıtyna bergen suhbatynda.

«Jumyspen qamtý baǵdarlamasynyń tórtinshi «Aýyldyq eldi mekenderdi damytý» baǵyty boıynsha ústimizdegi jyly 565 joba qarastyrylǵan, olardyń jartysy aıaqtalyp ta qoıdy. Kúzde barlyq jobalar tolyǵymen júzege asady dep josparlap otyrmyz», - dedi D.Arǵandyqov.

Bul baǵyt aýyldyq eldi mekenderde ınfraqurylymdar men áleýmettik nysandardy jóndeýdi júzege asyrý arqyly halyqty jumyspen qamtýǵa baǵyttalǵan.

«Birinshiden, jumyssyzdarda jumysqa ornalasý arqyly óz tabysyn arttyrý múmkindigi paıda bolady. Ekinshiden, bul aýyldyq jerlerdegi júıeli máselelerdi sheshýdiń joly, úshinshiden, bul kásipkerler úshin ekonomıkalyq paıda. Tórtinshiden, bul árıne, aýyl halqynyń densaýlyq jaǵdaıyn jaqsartý, sebebi aýyldyq dárigerlik ambýlatorııalardy salý men jóndeý jumystaryn júrgizý kózdelgen», - deıdi departament dırektory.

Tórtinshi baǵyt boıynsha júzege asyrylatyn jobalar aýyldaǵy ınjenerlik-kárizdik jáne áleýmettik ınfraqurylym  nysandaryn salý men jóndeý jumystaryn qamtıdy. Eńbek mınıstrliginiń aqparyna qaraǵanda, aýyldyq jerlerdegi jobalar boıynsha qurylǵan 4,8 myńdaı jumys ornyna ornalasqan 4 771 adamnyń  2 420-sy «Jumyspen qamtý -2020» baǵdarlamasynyń qatysýshylary.