Kúzde menıngıttiń taǵy órshýi múmkin be - Birtanovtyń jaýaby
«Menıngıttiń qaıtalaı órshýine daıarlyq týraly aıtar bolsam, eń aldymen menıngıt taraǵan ýaqytta dál ákimshilik sıpatta sharalar qabyldanǵan bolatyn. Respýblıkalyq shtab qurylyp, birqatar sharalar legi qabyldanǵan edi. Búkil elde ınfektsııalyq aýrýlardyń taralýy boıynsha profılaktıkalyq jumysty kúsheıtý jumystary qolǵa alynǵan. Atalǵan shtab menıngıt boıynsha, qazir de basqa áleýetti qaýipter, sonyń ishinde qyzylsha aýrýy boıynsha jumysty jalǵastyryp jatyr», - deıdi mınıstr.
Shtab aıasynda mınıstrlik jedel járdem, qabyldaý bóliminiń qyzmetkerlerin ýaqtyly ári sapaly dıagnostıka men sapaly medıtsınalyq kómek kórsetý boıynsha oqytý kýrstarynan ótkizgen.
«Bizdiń «Astana» ýnıversıtetiniń, Qazaq ulttyq medıtsınalyq ýnıversıtetiniń professorlyq-oqytýshylar quramyna erekshe alǵysymdy aıtqym keledi. Olar barlyq aımaqtarǵa shyǵyp, balalar aýrýhanasyna baryp, oqytý jumystaryn júrgizdi. Jalpy aıtarym, qazirgi tańda Qazaqstanda menıngıtke shaldyǵý deńgeıi baqylaýda. Búgingi tańda menıngıtke shaldyǵý sońǵy 20 jyldaǵy kórsetkish boıynsha ortasha deńgeıden bes ese az mólsherde ekeni anyqtaldy. Jalpy, bul jaǵdaı epıdemııa nemese taralatyndaı deńgeıde baǵalanyp otyrǵan joq», - dedi ol.
Eljan Birtanov kóktemde menıngıtke shaldyǵýdyń shyrqaý shegi tirkelgenin atap ótti.
«Ókinishke qaraı, aýrý kúrdeli. Údep ketýi de múmkin. Aqylǵa qonymsyz deńgeıde qabyldaý júrgizilgen jaǵdaılar boıynsha respýblıkalyq shtabtyń komıssııasy tıisti shara qabyldady. Jergilikti atqarýshy organdardyń bárine keleshekte mundaı jaǵdaılar bolmas úshin ákimshilik sharalardy qabyldaý kerektigi aıtyldy», - dep túıdi Eljan Birtanov.