Kúzde qandaı vırýstar taraıdy jáne olardan qalaı saqtanýǵa bolady
ASTANA. KAZINFORM – Kúzdiń kelýimen jótel, dene qyzýy, tamaq aýrýy jáne álsizdik sııaqty belgilerge shaǵymdanatyndar kóbeıedi. Mundaı jaǵdaıda jurttyń bir bóligi ony tumaý dep qabyldasa, endi biri COVID-19 qaıta kúsheıdi me dep alańdaıdy. Alaıda mamandar respıratorlyq ınfektsııalardyń belgileri uqsas bolǵandyqtan, aýrýdy tek sımptomdaryna qarap ajyratý qıyn ekenin aıtady. Bul týraly Qoǵamdyq densaýlyq saqtaý ulttyq ortalyǵy Infektsııalyq aýrýlardyń profılaktıkasy departamentiniń dırektory Meıirim Sultanova Jibek Joly telearnasynyń «Búgin.LIVE» baǵdarlamasynda aıtty.
Mamannyń aıtýynsha, Qazaqstanda tumaý, JRVI jáne COVID-19 boıynsha epıdemıologııalyq jaǵdaı apta saıyn baqylaý júrgiziledi.
– Búgingi kúni respýblıkada tumaý aýrýy tirkelmegen. Biraq rınovırýstyq, metapnevmovırýstyq, adenovırýstyq jáne basqa da ınfektsııalar aınalymda bar. Budan bólek, COVID-19 ınfektsııasy da eshqaıda ketken joq. Oǵan da apta saıyn monıtorıng júrgiziledi. tumaý men JRVI boıynsha epıdemıologııalyq maýsym ádette qazan aıynda bastalady. Al qyrkúıek aıynda oǵan daıyndyq jáne profılaktıkalyq sharalar kúsheıtiledi, – dedi Meıirim Sultanova.
Meıirim Sultanova aýrýdyń uzaqqa sozylýyna adamnyń durys em qabyldamaýy sebep bolýy múmkin ekenin aıtty.
– Naýqasta sozylmaly aýrýlar bolýy múmkin. Belgiler paıda bolǵan kezde tıisti em qabyldamaı, vırýsqa áser etpeıtin basqa dárilerdi qoldansa, aýrýdyń órshýine, odan ári taralýyna jáne uzaqqa sozylýyna áser etedi. Sondyqtan keı jaǵdaıda aýrý 2-3 aptaǵa deıin sozylyp ketedi, – dedi ol.
Infektsııalyq aýrýlardyń aldyn alý úshin maman eń aldymen bólmeni jıi jeldetýge, aýrý belgileri baıqalǵan jaǵdaıda basqa adamdarmen baılanysty shekteýge jáne ýaqytyly dárigerge qaralýǵa keńes berdi.
– Alǵashqy saqtyq sharalarynyń biri – bólmeni jeldetý. Aýrýdyń belgileri paıda bolǵan kezde basqa adamdarmen qatynaspaý kerek. Ásirese úıde balalar bolsa, ınfektsııany olarǵa taratpaý úshin baılanysty azaıtqan jón. Ýaqytyly dárigerge qaralyp, profılaktıkalyq sharalardy ustaný qajet, – dedi Meıirim Sultanova.
Ol antıbıotıkterdi óz betinshe qabyldamaý kerektigin de eskertti.
– Antıbıotıkterdi dárigerdiń retseptimen ǵana qabyldaý kerek. Eger adam vırýstyq ınfektsııamen nemese COVID-19-men aýyrsa, antıbıotık oǵan áser etpeıdi. Kerisinshe, ony orynsyz qabyldaý aýrýdyń sozylýyna yqpal etýi múmkin. Sonymen qatar antıbıotıkti kóp ári negizsiz qoldaný tózimdiliktiń paıda bolýyna ákeledi. Keıin aýyr jaǵdaıda bul dáriler áser etpeýi múmkin, – dedi maman.
Aldaǵy tumaý maýsymyna baılanysty qyrkúıek-qazan aılarynda vaktsınatsııa júrgiziledi. Meıirim Sultanovanyń aıtýynsha, tumaýǵa qarsy ekpe arnaıy tártipke sáıkes barlyq óńirde emhanalarda tegin salynady.
Tumaýǵa qarsy vaktsınatsııa medıtsına qyzmetkerlerine, sozylmaly aýrýlary bar balalarǵa, jabyq mekemelerde turatyn adamdarǵa jáne epıdemıologııalyq kórsetkish boıynsha vaktsına alýǵa tıis azamattarǵa tegin júrgiziledi.
Maman halyqqa maýsymǵa saı kıinýdi, tazalyq sharalaryn saqtaýdy, qoǵamdyq oryndarda profılaktıka talaptaryn ustanýdy jáne tumaýǵa qarsy vaktsına alýdy usyndy.
Aıta keteıik, buǵan deıin, vırýstyq gepatıtten qalaı qorǵanýǵa bolatynyn jazǵan edik.
