Kúzde ımmýnıtetti qalaı saqtaý kerek
JRVI men tumaý maýsymy aldynda durys tamaqtaný men uıqy, dene shynyqtyrý ımmýnıtetti jaqsartýǵa kómektesedi. Bul týraly Almaty qalasy N36 qalalyq emhananyń dárigeri Áıgerim Isaǵalıeva aıtty, dep habarlaıdy QazAqparat tilshisi.
«Gormondardyń yrǵaǵyn saqtaý úshin saǵat 23.00-ge deıin jatyp, tańǵy 7 nemese 8-de oıanǵan durys. Kúnine kem degende 7-10 myń qadam júrgen durys jáne shynyǵý protsedýrasyn shekten asyrmaý kerek, mysaly, aıaǵyńyzdy sýyq sýmen jýý kezinde. Talshyq pen dárýmenge baı jemis pen kókónisti kóbirek jeńiz. Kúndelikti tamaqtan kofe men alkogoldi alyp tastaǵan durys. Alkogoldi jáne kofeındi sýsyndar ımmýndyq júıeni álsiretip, júrekke qosymsha salmaq túsiredi», - deıdi dáriger.
Ol stresten aýlaq bolýǵa keńes berdi, sebebi, stress ımmýndyq júıege keri áser etýi múmkin. Gıgıena erejelerin saqtaý, qoldy jýý, ınfektsııanyń aldyn alý úshin dezınfektsııalyq quraldardy qoldaný qajet. Sonymen qatar, dáriger tumaýǵa qarsy vaktsına alýdy eske saldy, sebebi, ol aýrýdyń aldyn alýǵa jáne ımmýndyq júıeni nyǵaıtýǵa kómektesedi. Vaktsınany turǵylyqty jerińiz boıynsha emhanada tegin alýǵa bolady.
Áıgerim Isaǵalıeva sondaı-aq profılaktıkalyq dári-dármekterdi de qabyldaýǵa bolatynyn aıtty.
«Qoldanar aldynda sýyq mezgilge deıin ımmýnıtetti nyǵaıtý úshin qandaı dárýmen men mıneraldy qabyldaý kerek ekenin dárigerden belgenińiz jón. Sondaı-aq árıne maýsymǵa sáıkes kıiný kerek», - dep túıindedi dáriger.
