Kúzde elordada tabysy az otbasylarǵa áleýmettik karta beriledi

NUR-SULTAN. QazAqparat – Elorda ákimi Altaı Kólginov halyqtyń áleýmettik osal toptaryn azyq-túlikpen qamtamasyz etý jumystary jaıyndy aıtty, dep habarlaıdy QazAqparat.

«Áleýmettik mańyzdaǵy azyq-túlik boıynsha qadaǵalaý jumystary ózekti bolyp tur. Ásirese, maýsymaralyq kezeńde bul ózekti taqyryp ekeni belgili. Bıyl kúzde «Amanat» partııasymen birlese qanatqaqty joba retinde áleýmettik kartalardy berýdi iske qosamyz. Qazirgi kezde aınalymǵa 14 mlrd teńge bóldik. Bul qomaqty qarajat óz nátıjesin beredi, alaıda qajetti kólemdi tolyq qamtymaıdy», - dedi A. Kólginov elorda máslıhatynyń kezekten tys sessııasynda.

Onyń aıtýynsha, atalǵan is-sharalar ataýly sıpatta bolady.

«Azyq-túlik baǵasy kúrt ósken kezde, ıaǵnı elimizde tolyq kólemde óndirilmeıtinderi boıynsha baǵa sharyqtasa, onda áleýmettik karta ataýly sıpatta bolady. Bul kartalar halyqtyń áleýmettik jaǵynan osal toptaryna arnalady. Osy oraıda saýda jelisin qamtyp turǵan «Magnum» ókilderimen kelistik. Aldaǵy ýaqytta basqa da gıpermarketterge osy tájirıbeni taratamyz», - dedi ákim.

Budan buryn habarlanǵandaı, elordada halyqtyń áleýmettik osal toptary azyq-túlikti arnaıy karta arqyly satyp alady.