Kúzde áskerge qansha azamat shaqyrylady
ASTANA. KAZINFORM — Prezıdent Jarlyǵyna sáıkes Qazaqstanda kúzgi áskerge shaqyrý naýqany bastaldy. Onyń aıasynda qalalyq jáne aýdandyq shaqyrý komıssııalary jumysqa kiristi.
2026 jyldyń jeltoqsan aıynyń sońyna deıin áskerden keıinge qaldyrýǵa nemese áskerı qyzmetten bosatylýǵa negizi joq 18 ben 27 jas aralyǵyndaǵy 23 000-ǵa jýyq er-azamat merzimdi áskerı qyzmetke shaqyrylady. Olardyń ishinde 12 000-nan astam adam — Qarýly kúshter, 7 000 — Ulttyq ulan, 3 000 — UQK Shekara qyzmeti, 400-den astam adam — Tótenshe jaǵdaılar mınıstrligi, 300-ge jýyǵy — Memlekettik kúzet qyzmeti qataryn tolyqtyratyn bolady.
«Tsıfrlyq shaqyrý» júıesi men «Smart voenkomat» jobasynyń arqasynda áskerge shaqyrý jáne áskerı esepke alý qyzmetteriniń basym bóligi proaktıvti formatta kórsetiledi. Turǵylyqty jeri aýysqan kezde azamattardy áskerı esepke qoıý, 17 jastaǵy bozbalalardy tirkeý, sondaı-aq áskerge shaqyrýdy keıinge qaldyrý men bosatýdy usyný qyzmetteri avtomattandyryldy. Áskerı esepke qatysty barlyq málimetter azamattarǵa eGov portalyndaǵy jeke kabınetinde qoljetimdi.
Qorǵanys vedomstvosy merzimdi áskerı qyzmettiń bedelin arttyrý baǵytyndaǵy jumysty jalǵastyrýda. Onyń barysynda áskerı qyzmetshiler áskerı-eseptik mamandyqpen qatar, eńbek naryǵynda suranysqa ıe 20-ǵa jýyq jumysshy kásibin tegin meńgere alady. Olardyń qatarynda júrgizýshi, baılanys mamany, paramedık, ekskavatorshy jáne taǵy basqalary bar.
Budan bólek, sarbazdar úshin áskerı qyzmet ótkerý kezeńinde nesıe tólemderin keıinge qaldyrý jáne UBT tapsyrmaı-aq memlekettik bilim berý granty boıynsha joǵary oqý oryndaryna túsý múmkindigi qarastyrylǵan.
Osylaısha, Qorǵanys mınıstrligi áskerı qyzmetti uıymdastyrý sapasyn arttyrýǵa, tsıfrlyq servısterdi damytýǵa jáne sarbazdardyń ata-analarymen ózara baılanysty nyǵaıtýǵa baǵyttalǵan jobalardy júıeli túrde júzege asyryp keledi. Bul rette qyzmet ótkerý qaýipsizdigine, Qarýly kúshterdiń ashyqtyǵyna jáne áskerı qyzmetshiler úshin zamanaýı áleýmettik-turmystyq jaǵdaılar jasaýǵa erekshe nazar aýdarylady.
Merzimdi áskerı qyzmet — ol eldiń qorǵanys qabiletin qamtamasyz etý júıesiniń mańyzdy elementi. Áskerde shyńdalǵan sarbazdar memlekettiń jumyldyrý rezervin quraıdy. Al áskerı ómirdiń ózi olardyń boıynda temirdeı tártip pen jaýapkershilikti, kóshbasshylyq qabilet pen ujymda jumys isteý daǵdysyn qalyptastyrady.
Aıta ketelik 1 qyrkúıekten bastap alǵashqy áskerı daıyndyq páni jańartylǵan baǵdarlamamen ótedi.
