Kúz jáne qys maýsymynda Qazaqstannyń sý aıdyndarynda 16 adam qaza boldy - TJM
NUR-SULTAN. QazAqparat – Bıylǵy jyldyń kúz ben qys mezgilderinde elimiz boıynsha 16 adam qaıtys boldy, onyń ishinde 5 bala bar, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, mınıstrliktiń aýmaqtyq bólimsheleri sý aıdyndarda adamdardyń (balyqshylardyń) qaza bolýynyń aldyn alý boıynsha reıd jáne profılaktıkalyq is-sharalar ótkizedi. Reıd barysynda balyq aýlaý kezindegi qaýipsizdik sharalaryn saqtaý týraly aqparattyq jadynamalar taratylady.
Máselen, 2020 jylǵy 9 jeltoqsanda TJ mınıstrliginiń jáne Nur-Sultan qalasy TJ departamentiniń qyzmetkerleri, volonterler áýesqoı balyqshylar arasynda Nur-Sultan qalasynyń sý aıdyndaryndaǵy kezekti profılaktıkalyq, reıdtik is-shara ótkizdi. Іs-shara barysynda Apattar medıtsınasy ortalyǵy qyzmetkerleri is júzinde zardap shekken adamǵa kórsetý tásildermen tanystyrdy. Muz astyna túsip ketken adamdy qutqarý kezindegi is-qımyldarda da pysyqtaldy.
Jalpy respýblıka boıynsha Tótenshe jaǵdaılar departamentteri Polıtsııa departamentterimen birlesip, balyq aýlaý oryndarynda, muz ústimen ótetin jerlerde patrýldeý, aralaý jumystary jáne reıdterdi turaqty júrgizip keledi. Kúz-qys mezgilinde 4 512 patrýldeý jáne reıd ótkizildi, sýdaǵy júris-turys qaǵıdalaryn saqtaý boıynsha 15 769 nusqaýlyq berildi.
Kún saıyn qaýipti sý aıdyndarynda, muzdyń qalyńdyǵyn baqylaý jumystary júrgiziledi. Ol jerlerde 1 095 eskertý belgisi ornatylǵan.
Aǵymdaǵy jylǵy 1 jeltoqsandaǵy jaǵdaı boıynsha sý aıdyndaryndaǵy muzdyń qalyńdyǵy:
- soltústik óńirde - 5-8 sm.;
- batys óńirde - 1-3 sm.;
- ortalyq óńirde - 10-12 sm.;
- shyǵys óńirde - 25-30 sm.;
- ońtústik óńirde - 3-4 sm.
Ań jáne balyq aýlaý maýsymy bastalǵannan beri (2020 jylǵy 1 qazan-7 jeltoqsan) eldiń sý aıdyndarynda 16 adam, onyń ishinde 5 bala qaza tapty.
Balyq aýlaý kezinde erejelerdiń buzylýynan 11 adam qaza tapty jáne eresek adamdardyń qaraýynsyz qalǵan 5 bala abaısyzda sýǵa qulap, sýǵa batyp ketti.
Aǵymdaǵy jyly qaza bolǵandar Aqmola (5 adam), Almaty (3 adam, onyń ishinde 2-eýi bala), Jambyl (2 bala), Qostanaı (2 adam), Qyzylorda (2 adam), Mańǵystaý (1 bala), Túrkistan (1 bala) oblystarynyń sý aıdyndarynda tirkeldi.
Máselen, ótken kúz jáne qys maýsymynda (2019 jylǵy 1 qazannan bastap 2020 jylǵy 1 naýryzǵa deıin) elimizdiń sý aıdyndarynda balyq aýlaý kezinde qaýipsizdik erejelerin buzý saldarynan, sondaı-aq muz ótkelderi arqyly ótý kezinde 37 adam (onyń ishinde 10 bala) qaza boldy. Adamdardyń qaza bolýynyń negizgi sebepteri:
1) 19 adam balyq aýlaý kezinde (jaǵalaýdan jáne/nemese júzý quraldarynan) sýǵa qulaǵan;
2) 7 adam balyq aýlaý kezinde muz astyna qulap ketken;
3) oınap júrip 8 bala muz astyna túsip ketken, 2 bala sýǵa qulaǵan;
4) 1 adam muz ótkelderi arqyly ótý kezinde qulaǵan.
Aýmaq boıynsha alyp qarasaq, qaza bolǵandar Aqmola, Atyraý, Almaty, Aqtóbe, Shyǵys-Qazaqstan, Jambyl, Batys-Qazaqstan, Qostanaı, Qaraǵandy, Soltústik Qazaqstan oblystarynyń jáne Almaty qalasynyń sý aıdyndarynda tirkeldi.
Osyǵan baılanysty, el azamattaryn tómendegideı qaýipsizdik erejelerin saqtaýǵa shaqyramyz:
1) táýliktiń qarańǵy ýaqytynda jáne nashar kóringen kezde muzǵa shyqpańyz;
2) muzdyń juqa jáne qatpaǵan jerlerimen júrmeńiz;
3) muzdyń jekelegen bóliginde toptasýǵa bolmaıdy;
4) muzdaǵy shuńqyrlarǵa, jaryqtarǵa, oıyqtarǵa jaqyndamańyz;
5) avtomobıldermen ótkelderden tys jerlerge shyqpańyz.
«Muz astynan balyq aýlaýǵa bolmaıdy, balyqty jeke qutqarý quraldary bolǵan jaǵdaıda ǵana aýlaý qaýipsiz. Sondaı-aq shekteýli alańda ekiden kóp shuńqyr tesýge jáne ot jaǵýǵa jol berilmeıdi, adamdar ótetin jerlerge balyq aýlaýǵa arnalǵan jelilerdi ornatýǵa jáne shuńqyrlardy tesýge bolmaıdy.
Bir adam úshin muzdyń qaýipsiz qalyńdyǵy keminde 10 sm. jaıaý ótkeldi jasaý úshin muzdyń qaýipsiz qalyńdyǵy 15 sm jáne odan astam bolýy kerek. Avtomobılderdiń ótýi úshin muzdyń qaýipsiz qalyńdyǵy keminde 30 sm bolýy kere»,-delingen habarlamada.
