Kuz Open-2018: Almatyda grepplıng sportshylary 10 myń dollardy sarapqa saldy
ASTANA. QazAqparat - Almatyda grepplıngten Arlan Grip Selection «Kuz open-2018» halyqaralyq ashyq týrnıri aıaqtaldy, dep aqparattyq jáne sporttyq HAB habarlaıdy.
14 qazanda ótken jarystyń ekinshi kúninde 18 jastan joǵary elimizdiń ár óńirlerinen jáne Reseı, Qyrǵyzstan, Ózbekstannan kelgen 150-ge jýyq sportshy qatysty. Olar ár túrli salmaq jáne jas dárejeleri boıynsha synǵa tústi.
Bul saıystar ABB arenasynda, AIGA halyqaralyq áýesqoılar lıgasy qaýymdastyǵynyń erejelerine sáıkes eki dáreje boıynsha «Beginner», «Intermediate», sondaı-aq kásipqoılar arasynda ADCC erejesi boıynsha ótkizildi.
«Bul týrnırdiń basty maqsaty myqty sportshylardy anyqtap, olarǵa úlken jarystarǵa daıyndalýǵa múmkindik berý bolyp tabylady. Alda, jeltoqsan aıynda biz eki jylda bir bolatyn Azııa jáne Okeanııa chempıonatyń ótkizemiz. Ol jarysta 2019 jyly AQSh-tyń Kalıfornııa shtatynda ótetin álem chempıonatyna joldama oınatylatyn bolady. AIGA qazir áýesqoılar arasynda grepplıng sportyn álem boıynsha qarqyndy túrde damytýda. Bul tujyrym byltyr jeltoqsan aıynda qurylyp, bıyl Qazaqstan chempıonaty men kýbogyn ótkizip úlgerdi. Qazir bizde osy sport boıynsha sol AQSh-ta ótetin álem chempıonatyna AIGA tujyrymynda óner kórsetetin ulttyq qurama qurylyp jatyr», - deıdi QR brazılııalyq djıý-djıtsý jáne grepplıng federatsııasynyń prezıdenti Tólegen Qumarov.
Qyzyqty ári tartysty jarys qorytyndysynda jeńimpazdar men júldegerlerge medaldar, dıplomdar jáne aqshalaı syılyqtar tabystaldy. Týrnırdiń jalpy júlde qory 10 myń dollardy qurady.
Týrnırdiń absolıýttyq chempıony bolyp almatylyq Azamat Baqytov atandy. Ol fınaldyq kezdesýde Shyńǵys Qydyrmanovtan basym tústi. Osy jeńisi úshin ol 500 dollarmen marappataldy.
«Grepplıngpen úshinshi jyl aınalysqanyma.Qazaqstan jáne Azııa chempıonattryn utqanmyn, endi mine osy jarysta jeńiske jettim. Qarsylastarym qıyn boldy, olardy men kópten beri biletinmin. Jeńisime óte qýanyshtymyn, uıymdastyrýshylarǵa raxmet», - dep óz oıymen Azamat Baqytov bólisti.
Týrnırdiń barlyq nátıjelerimen www.arlangrip.kz saıtynan tamashalaı alasyzdar.
