Kúz kelgende Aqtóbedegi qalalyq emhanada jylý qubyry aýystyrylyp jatyr

Aqtóbe qalasyndaǵy №1 emhanada qubyr aýystyrý, jańartý jumystary kúzde bastaldy. Kelisim boıynsha bıyl qarasha aıynda bar jumys aıaqtalýy tıis, dep habarlaıdy Kazinform.

Aqtóbe qalasyndaǵy №1 qalalyq emhana 2009 jyly qoldanysqa berilgen. Arada shamamen 15 jylǵa jýyq ótse de jylý berý júıesi jańarmady. Emhana ákimshiliginiń habarlaýynsha, tozý deńgeıi 80 paıyzǵa jetken kezde aýystyrýǵa sheshim qabyldanǵan. 

- 2022 jyldyń kúzinde munda jylý berý qıyndap, kelýshiler tarapynan kóp syn-eskertpe aıtyldy. Keıde jylý berý toqtap qaldy. 2023-2024 jyldardaǵy jylý berý maýsymy kezinde múlde isten shyǵady degen qaýip bolyp, tehnıkalyq tekserý jáne baǵalaý júrgizildi. «Aktobe GenStroı» JShS-i bıyl maýsym aıynda jylý berý júıesiniń qubyryn tolyq aýystyrý, santehnıkalyq qurylǵylardy jańartý, ishki sý, káriz qubyryn ózgertý týraly sheshim shyǵardy. «ASK Project 1» JShS-i jobalyq-smetalyq qujat jasaý kezinde jylý berý júıesi isten shyǵyp turǵany aıtyldy. Aqaýy kóp bolǵan soń júıesi buzylyp, keıbir batareıalar salqyn bolyp turdy.

Bıyl shilde aıynda oblystyq densaýlyq saqtaý basqarmasy kúrdeli jóndeý jumystaryna dep 68,7 mln teńge qarastyrdy. Bul qarjyǵa avtorlyq jáne tehnıkalyq baqylaý shyǵyny kirdi. Al 15 shilde kúni emhana Aqtóbe oblystyq memlekettik satyp alýlar basqarmasyna suranys jiberdi. 20 shilde kúni baıqaý jarııalandy. №1 qalalyq emhana men «Alan Costruction» JShS-i arasyndaǵy kelisimshart 18 tamyz kúni jasaldy. QQS qosqanda 58,7 mln teńge. Jumys eki aıǵa josparlanǵan. Qurylys-montajdaý jumystarynyń bastalǵany týraly habarlama 2023 jyldyń 27 qyrkúıeginde berilgen. Búgingi kúnge deıin jumys 85 paıyzǵa oryndaldy. Merdiger materıaldardy tolyq kólemde satyp aldy, jumys 3 aýysymda júrgizilip jatyr, - dep habarlady Aqtóbe qalasyndaǵy №1 qalalyq emhana ákimshiligi.

Qazirgi kezde jertólede qubyr dánekerleý jumysy júrip jatyr. Sonymen birge barlyq batareıa aýystyryldy. Jumys qarasha aıynyń sońynda aıaqtalady.