Kúz keldi: ımmýnıtetti qalaı nyǵaıtamyz
ASTANA. KAZINFORM – 26 tamyzda elimizdiń Bas memlekettik sanıtarııalyq dárigeri 2026–2027 jyldardaǵy epıdemııalyq maýsymǵa arnalǵan jańa qaýly qabyldady. Qujatta tumaýǵa qarsy vaktsınatsııa júrgizý, medıtsınalyq uıymdardyń daıyndyǵyn kúsheıtý, vırýstarǵa zerthanalyq baqylaý jasaý jáne bilim berý uıymdarynda tańerteńgi súzgi uıymdastyrý qarastyrylǵan.
Bıyl vaktsınatsııa qashan bastalady? Ekpeni kimder tegin ala alady jáne oǵan qalaı daıyndalý qajet?
Osy jáne ózge de saýaldarǵa QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń bas sarapshysy Araı Zekenova Jibek Joly telearnasynyń «Búgin.LIVE» baǵdarlamasynda jaýap beredi.
Kúzde kún salqyndap, adamdar jabyq ǵımarattarda kóbirek ýaqyt ótkizedi. Osy kezeńde tumaý men jiti respıratorlyq vırýstyq ınfektsııalardyń taralý qaýpi artady. Sondyqtan aýrýdyń aldyn alý sharalaryn erte bastaǵan mańyzdy.
- Qazirgi tańda epıdemıologııalyq jaǵdaı turaqty. Kún sýyǵan saıyn JRVI men tumaý jaǵdaılarynyń artýy – jyl saıyn kútiletin maýsymdyq kezeń. Bul ınfektsııalar kúz-qys mezgilinde jıi taralady. Aldaǵy maýsymda tumaýdyń A tıpti H1N1 jáne basqa da A jáne V tıpteriniń shtamdary kútiledi. Qazirgi tańda qoldanylatyn vaktsına quramynda osy maýsymda kútiletin shtamdarǵa qarsy komponentter bar, - dedi ol.
Mamandar tumaýǵa qarsy ekpeni epıdemııalyq maýsym bastalǵanǵa deıin alǵan durys ekenin aıtady. Óıtkeni vaktsına saldyrǵannan keıin aǵzada qorǵanysh ımmýnıtetiniń qalyptasýyna shamamen eki apta ýaqyt qajet. Ekpe juqtyrýdan tolyq qorǵamaýy múmkin, alaıda aýrýdyń aýyr ótýi men asqyný qaýpin tómendetedi.
- Bıyl 2 mıllıonǵa deıin adamdy vaktsınatsııalaý josparlanyp otyr. Halyqty barynsha tolyq qamtý úshin «Grıppol+» vaktsınasy satyp alyndy. Bul – Reseıde óndirilgen vaktsına. Eń aldymen jıi aýyratyn balalarǵa, júkti áıelderge, egde jastaǵy adamdarǵa jáne medıtsına qyzmetkerlerine salynady. Sonymen qatar vaktsına alǵysy keletin azamattar ony óz erkimen de ala alady, - dedi Araı Zekenova.
Byltyrǵy maýsymmen salystyrǵanda bıyl JRVI boıynsha medıtsınalyq uıymdarǵa júgingender sany 17 paıyzǵa azaıǵan eken.
- Ótken maýsymda 17,4 mıllıon adam JRVI boıynsha medıtsınalyq kómekke júgingen. Al koronavırýs ınfektsııasyna keletin bolsaq, byltyr 64 jaǵdaı tirkeldi. Ólim-jitim jaǵdaıy bolǵan joq, - dedi ol.
Araı Zekenovanyń aıtýynsha, vaktsınatsııanyń negizgi paıdasy — aýrýdyń aýyr ótýiniń aldyn alý. Buǵan deıin vaktsına alǵan adamdar ınfektsııa juqtyrǵan jaǵdaıda da aýrýdy jeńilirek ótkeredi.
Aıta keteıik, Kongoǵa Ebola indetine qarsy vaktsınanyń alǵashqy partııasy jetkizildi.
