Kúz ben kóktem mezgilinde ınsýlt alý qaýpi joǵary
ASTANA. KAZINFORM — Insýltpen aýyratyn jastardyń sany artyp keledi. Dárigerler dál osylaı dep dabyl qaǵyp otyr.
Máselen, birer kún buryn Shyǵys Qazaqstan oblystyq arnaıy medıtsınalyq ortalyq dárigerleri ınsýlt alǵan 19 jastaǵy qyzǵa sátti tromboekstraktsııa jasap, ajaldan arashalap qalǵanyn jazǵan edik. Al Ulttyq shuǵyl medıtsınany úılestirý ortalyǵynyń mamandary 30 jastaǵy azamattar da ınsýltke shaldyǵyp jatqanyn jetkizdi.
— Bizdiń departamentte 28 naýqasqa arnalǵan oryn bar. Onyń ishinde 12 oryn neırohırýrgııalyq, 10 oryn ınsýltqa, 8 oryn nevrologııalyq naýqastarǵa arnalǵan. Osy bólimshe ashylǵan 3 aıdan beri 276 naýqasqa em kórsetildi. Onyń ishinde 100 naýqas bas mı jaraqatymen, 120 adam ınsýltpen, 56 adam nevrologııalyq aýrýlarmen kelip tústi. Olardyń 49-yna ota jasaldy. Operatsııa keıde 1 saǵat, keıde 4-5 saǵatqa sozylyp jatady. Onyń bári mıǵa quıylǵan qannyń mólsherine baılanysty. Búginge deıin eń uzaq jasaǵan operatsııamyz — 5-6 saǵat bolǵan. Kóbinese bas mı jaraqaty men ınsýlt alǵan naýqastarǵa ota jasaımyz. Insýltke shaldyǵyp, em alǵan naýqastardyń eń jasy — 30-35 jastaǵy azamattar, — deıdi neırohırýrg Erkin Dúısenbaev Kazinform tilshisine bergen suhbatynda.
Dáriger ınsýltke shaldyqqan naýqastardyń jıi jiberetin qateligine toqtaldy.
— Keı naýqastar «170-180 qan qysymymen júremin, maǵan múlde sezilmeıdi» dep maqtanady. Mundaı organızm ýaqyt óte kele sharshaıdy. Sol kezde tamyrdyń álsiz bólikteri jyrtylyp ketedi. Nemese júrek yrǵaǵynyń buzylýyna baılanysty qan uıyp qalady. Munyń bári ınsýltke alyp keledi, — deıdi ol.
Neırohırýrg kóktem jáne kúz aılarynda ınsýltke shaldyǵý qaýpi joǵary ekenin aıtady.
— Qan qysymyna aýa raıy da áser etedi. Ásirese qubylmaly aýa raıy júrek aýrýlary bar, bas jaraqattaryn alǵan nemese ınsýlt alǵan naýqastarǵa qatty áser etedi. Kúz ben kóktem sekildi aýa raıy jıi qubylatyn mezgilderde ınsýlt alǵan naýqastar kóp bolyp jatady, — deıdi maman.
Dál osylaı, ystyq aýa raıynda ınsýltke shaldyǵyp, aýrýhanaǵa túskenderdiń biri — qostanaılyq Qarashash Jaqybaeva. Ol Astanadaǵy balasynyń úıine qonaqqa kelip, Ulttyq shuǵyl medıtsınany úılestirý ortalyǵynan bir-aq shyǵypty.
— Men Astanaǵa balamnyń úıine qonaqqa kelgen edim. 17 shilde kúni taksıge otyrǵanda óz aıaǵymdy basqara almaı qaldym. Balam birden jedel járdem shaqyrdy. Alǵash aýrýhanaǵa túskenimde bir qolym men aıaǵymda jan bolǵan joq. Múlde qozǵala almadym. Kesheden beri ózim júrip, terezege deıin baryp, tamaǵymdy ózim iship, qýanyp jatyrmyn. Qazir qolym da birtindep qalypqa kelip jatyr. Buǵan deıin mundaı aýrýmen aýyrmaǵanmyn. Tek bettegi júıke júıesiniń aýrýy bolǵan. Ózim ystyqtan boldy dep oılaımyn. Aýrýhanaǵa túskende qan qysymym 190 bolǵan. Qazir 120-ǵa tústi. Ádette aýylda 140-pen júre beremiz ǵoı, — deıdi 65 jastaǵy naýqas.
Al Erkin Dúısenbaev neırohırýrgııa salasy boıynsha Qazaqstan Ortalyq Azııa elderi arasynda aldyńǵy qatarda ekenin tilge tıek etti.
— Neırohırýrgııa ortalyǵy ashylǵaly beri respýblıkalyq deńgeıde kóptegen kúrdeli otalar jasaldy. Al bizdiń ortalyǵymyzdaǵy mamandar — sol neırohırýrgııa ortalyǵynda oqyǵan shákirtter. Dál osy salaǵa qatysty ınsýltti joǵary tehnologııalyq jolmen emdeý boıynsha Qazaqstan Ortalyq Azııadaǵy alǵashqy oryndarda dep aıtýǵa bolady. Bizdiń dárigerlerimiz sheteldik mamandarǵa óziniń master-klasstaryn kórsetip, bilimderin bólisip, kómektesip jatyr. Elimizge ózge memleketterden de kelip, ota jasatatyn naýqastar bar, — deıdi Ulttyq shuǵyl medıtsınany úılestirý ortalyǵy neırohırýrgııa departamenti dırektorynyń mindetin atqarýshy.
Aıta keteıik, buǵan deıin ınsýltke shaldyqqan qazaqstandyqtardyń úshten biri kóz jumatynyn jazǵan edik.