Kúz-2024: áskerı qyzmetshiler myńnan astam bilim grantyn aldy
ASTANA. KAZINFORM — Qazaqstanda Qarýly kúshterdiń bedelin arttyrýǵa jáne jastardy merzimdi qyzmet ótkerýge yntalandyrýǵa baǵyttalǵan jobany iske asyrý jalǵasyp jatyr. Bul týraly Qorǵanys mınıstrligi málim etti.
Úsh myńnan astam memlekettik bilim berý granttary, onyń ishinde eki myńnan astamy — «Kóktem-2024», myńnan astamy — «Kúz-2024» áskerge alynyp, 2025 jyly qyzmetin aıaqtaǵan azamattarǵa berildi.
— Áskerden bosatylǵannan keıin eki jyl ishinde qazaqstandyqtar azamattyq jáne áskerı joǵary oqý oryndaryna UBT tapsyrýsyz aqyly negizde oqýǵa túse alady. Odan ózge konkýrstyq irikteýden sátti ótken Sarbaz 2.0 jobasyna qatysýshylar úshin memleket esebinen joǵary bilim alý múmkindigi qarastyrylǵan, — delingen habarlamada.
Granttardy bólýdiń ashyqtyǵyn Sarbaz 2.0 aqparattyq júıesi qamtamasyz etedi. Munda jaýyngerlik daıarlyq kórsetkishteri, tártip jáne árbir áskerı qyzmetshiniń testileý nátıjeleri tirkeledi. Іrikteý nátıjeleri platformada jarııalanady jáne bul qatysýshylarǵa óz derekterin óz betinshe tekserýge múmkindik beredi.
2025 jyldan bastap memlekettik grant ıegerlerine qosymsha stıpendııa, jataqhana jáne áskerı kafedrada konkýrstan tys oqytý sııaqty jeńildikter beriledi. Bul ofıtserlik qyzmetke jol ashady.
Joba iske qosylǵan 2023 jyldan beri merzimdi qyzmetten ótken azamattarǵa toǵyz myńnan astam bilim berý granty bólindi.
Grant ıelengen «Kúz-2024» áskerı qyzmetshileriniń tizimin myna silteme arqyly kóre alasyzdar.
Eske sala keteıik, 1 jeltoqsanda Qarýly kúshterde jańa oqý jyly bastaldy.