Kúızelisten qutylý úshin júristi túzeý kerek - Ǵylymı zertteý
ASTANA. QazAqparat - Adamny júris-turysy onyń kóńil-kúıine de áser ete alady. Máselen, kóńilsiz, unjyrǵasy túsip júretin adamdar kóbine sylbyr, ıyǵy salbyrap júredi. Al, baqytty adamdar eńseleri kóterińki júredi, dep jazady «Rosbalt».
Osy máselege baılanysty, Kanada ınstıtýtynyń ǵalymdary jańa zertteý nátıjelerin usynyp otyr. Olardyń aıtýynsha, eger júrisińdi ózgertseń, kóńil-kúıiń de jaqsara túsedi. Osyǵan deıin ǵalymdar kúızelip júretin adamdar baqytty adamdardaı júrip-turmaıtynyn anyqtaǵan bolatyn. Al, jańa zertteýde ǵalymdar synaqqa qatysýshylarǵa erekshe tájirıbe júrgizgen. Olarǵa jaǵymdy jáne jaǵymsyz sózderdi tańdatyp, júgirý jolaǵymen ersili-qarsyly júrgizgen. Ǵalymdar olardyń qozǵalystary men syrtqy keıpine baǵa bergen. Tájirıbe júrgizý kezinde júristeri báseń bolǵandar teris sózderdi kóp eske túsiretini anyqtalyp, olardyń júrisi kóńil-kúıine áser etkeni anyqtalǵan. Osyǵan deıingi zertteýler kúızeliske ushyraǵan adamdardyń óz ómirin eske túsiretin jaǵymsyz oqıǵalary pozıtıvti adamdarǵa qaraǵanda kóbirek ekenin kórsetken bolatyn.
