Quıyndy jel ǵımarattar shatyryn ushyrdy: Qordaıda tótenshe jaǵdaı jarııalandy

TARAZ. QazAqparat – Jambyl oblysyna qarasty Qordaı aýdanynda birneshe kúnge jalǵasqan qatty jel 3 mektep pen 1 balabaqshanyń shatyryn ushyryp áketti. Aldyn ala esep boıynsha shyǵyn kólemi – 99 mln teńge. Bul týraly QazAqparat tilshisiniń saýalyna jaýap bergen aýdan ákiminiń orynbasary Damıra Súgirbaı málim etti.

Búgin «Ashyq» NQA portalyna Qordaı aýdanynyń aýmaǵynda tehnogendik sıpattaǵy tótenshe jaǵdaı jarııalaý týraly ákimdik sheshimi shyqty. Máseleni anyqtaý maqsatynda aýdan ákiminiń orynbasary Damıra Súgirbaıǵa habarlasqan edik. Onyń málimetinshe, tótenshe jaǵdaı rejımi birneshe kúnge sozylǵan qatty jelge baılanysty engizilip otyr.

«31 naýryz kúni keshke qaraı jel bastalyp, búginge deıin qatty soǵyp jatyr. Kúnde keshke 10-ǵa deıin jel bolady. Aýa-raıy boljamyna saı, jeldiń jyldamdyǵy sekýndyna 27-28 metr. Keıbir kezde bul tipti 30-dan asyp jatyr. 3 mekteptiń, 1 balabaqshanyń shatyry ushyp ketti. Birshama órt te shyǵyp jatyr. Jel Sovhoz jáne Atar aýmaǵynda bolyp jatyr. Kolhoz eldi mekeniniń aýmaǵynda jel joq. Gaz qubyrlary men jaryq transformatorlary qulap jatyr», - dep túsindirdi Damıra Súgirbaı.

Onyń aıtýynsha, zardap shekkender joq. Balalar mektepterge baryp oqyp jatyr.

«Sabaqty toqtatqan joqpyz. Sebebi mekteptiń barlyq shatyryn birden ushyryp áketken joq. Máselen, bir mektepte akt zalynyń shatyryn, endi bir mektepte taǵy bir bóligin ushyryp alyp ketken. Biz balalar demalǵan senbi, jeksenbi kúnderi mektepter men balabaqshanyń shatyryn tolyq sheship, jerge túsirip, jınap qoıdyq», - dep málim etti aýdan ákiminiń orynbasary.

Damıra Súgirbaıdyń dereginshe, ótken demalys kúnderi Jambyl oblysy ákiminiń orynbasary, bilim basqarmasynyń basshysy men ózge de jaýapty organdardyń ókilderi jelden zaqym kelgen nysandarmen tanysqan. Sonyń negizinde aýdanda tehnogendik sıpattaǵy tótenshe jaǵdaı jarııalaý sheshimi qabyldanǵan.

«Zaqym kelgen áleýmettik nysandardy qalpyna keltirý bir kúnde sheshile qoımaıdy. Ol demeýshiniń kómegimen de sheshimin tappaıdy. Shyǵyn somasy eseptelýde. Bul bilim nysandarynyń barlyǵy oblystyq basqarmanyń teńgeriminde. Sondyqtan tehnogendik sıpattaǵy tótenshe jaǵdaı jarııalaý týraly sheshim qabyldandy», - dep túıindedi Damıra Súgirbaı.

Qordaı aýdany ákiminiń orynbasary sınoptıkter boljamyna sáıkes, jel 4 sáýir kúni basylýy múmkinin ekenin jetkizdi. Keıin nysandardy jóndeý jumysy bastalady.