Kúıshi Seken Turysbekov ónerpaz jastarǵa bata berdi
Búgin Almaty qalasynda Jastar resýrstyq ortalyǵynda qalalyq Jastar saıasatyn damytý qorynyń uıymdastyrýymen «NAURYZDEPO» merekesi ótti.
Saltanatty merekede qazaq halqynyń úlkenge qurmet, kishige izet jolymen bata berý salty kórsetildi. Batany QR Eńbegi sińgen qaıratkeri, «Parasat», «Qurmet» ordenderiniń ıegeri, tanymal kúıshi Seken Turysbekov berdi.
«Ulystyń uly kúni qutty bolsyn! Barlyǵy baıandy baısaldy bolsyn. El irgesi berik, aǵaıyn aman, tóńirek túgel bolsyn. Aı jylǵa ulasyp, halqymyz Naýryzdan Naýryzǵa aman jete bersin», - dedi Seken Turysbekov.
Merekelik jıynǵa Seken Turysbekov ózi qurǵan «Aq jaýyn» ansamblin ala kelip, búgingi jyl basyn toılaýǵa arnalǵan merekede óner ujymynyń tusaýyn kestirdi. Ózi de qolyna dombyra alyp, «Kóńil tolqyny» kúıin shertip berdi.
«Aq jaýyn» ansambli alǵash ret búgin sahnaǵa shyqty. Erteń Jazýshylar odaǵynda óner kórsetedi. 30 naýryz kúni Jarasqan Ábdirash aǵamyzdyń 70 jyldyǵynda Respýblıka saraıynda ózderin taǵy da tanytpaq. Ansamblde 18 adam, ánshilermen 21 adam. Qurylǵanymyzǵa mine, bir jarym aıǵa endi toldy», - dedi Seken Turysbekov.
«Aq jaýyn» ansambliniń múshesi, dombyrashy Tolǵanaı Hasenova óner ujymynyń ereksheligin aıtyp berdi.
«Aq jaýyn» ansambliniń quramynda Qurmanǵazy atyndaǵy Qazaq ulttyq konservatorııasynyń stýdentteri bar. Repertýramyzda Seken aǵanyń kúıleri bar. Maqsatymyz - jastarǵa kúıdi nasıhattaý. Biz oryndaıtyn shyǵarmalardan vıolenchel, kameralyq dybystardy estýge bolady. Bul bizdiń ereksheligimiz. Qazirgi ýaqytta repertýarymyzda ár dástúrli mektepten 30-ǵa tarta shyǵarma bar», - dedi Tolǵanaı Hasenova.
Sonymen qatar, búgingi jastarǵa arnalǵan Naýryz merekesinde oqýshylardan quralyp, qazirgi ýaqytta álemniń birneshe elinde úsh ishekti dombyrany tanytyp úlgergen «Arnaý» folklorlyq etnografııalyq balalar ansambli de óner kórsetti.
«Bizdiń ansambl mektep oqýshylarynan quralǵan. Qurylǵanymzǵa bıyl 10 jyl tolady. Osy ýaqyt aralyǵynda Bolgarııa, Túrkııa, Italııa, Birikken Arab Ámirlikterinde úsh ishekti dombyramyzdy tanytyp, halyqaralyq baıqaýlarda jeńimpaz atandyq. Bizdiń ansamblde bir balaǵa birneshe aspapta oınaýǵa úıretemiz. Atap aıtqanda, kóne aspaptardy erkin meńgergenbiz. Repertýramyzda Abaı, Shákárim, Shákir Ábenovtiń shyǵarmalary bar. Úsh ishekti dombyrany Jarqyn Shákárim atamyz dáleldese, biz sahnada tanytyp kelemiz», - deıdi ansambl jetekshisi, bilim berý isiniń úzdigi Nurgúl Ákimqoja.
Sondaı-aq, sharada toǵyz qumalaq pen arqan tartýdan saıys ótti. 
