Kúıshi Dına Nurpeıisovanyń balýan bolǵandyǵyn kóp adam bile bermeıdi - Sánen Ájıeva
ALMATY. 4 naýryz. QazAqparat /Áıgerim Ámir/ - Saýsaǵynan kúı saýlaǵan áıgili kúıshi Dına Nurpeısova dombyrashy ǵana emes, toı-dýmannyń kórkin qyzdyrǵan sheber balýan da bolǵan.
QazAqparat tilshisine bergen suhbatynda QR Mádenıetine eńbegi sińgen qyzmetker, dombyrashy, ustaz Sánen Ájıeva osylaı aıtty.
«Dına apamyzdyń qarapaıymdylyǵynan buryn jigerliligine bas ııýi kerek. Kezinde qyz-kelinshekterimiz shalbar kıip, kúrespek túgili el aldynda óz oılaryn tolyq bildire almaýshy edi. Al Dına Kenjeqyzy kez kelgen toı-dýmanda dombyra shertip, kúı tartýmen birge bilegin túrip, kúreske de túsetin sheber balýan bolǵan», - deıdi Sánen Ájıeva. Onyń aıtýynsha, Dınanyń qos qolymen birdeı dombyra shertýdegi sheberligi kórgen adamdy erekshe qaıran qaldyratyn. Kózi jumylǵansha sahnadan túspegen dańqty óner sheberi kez-kelgen ortada ózin erkin ustaıtyn.
QazKSR-niń halyq ártisi Dına Kenjeqyzy 1861 jyly ómirge kelip, 1955 jyly 94 jasynda kóz jumdy. Ákesi Kenje aýyl-aımaqqa esimi belgili dombyrashy bolǵan. 8-9 jasynda dombyrany erkin meńgergen Dınanyń ómirine 1870 jyly Qurmanǵazymen kezdesýi úlken ról atqardy.
1937 jyly halyq ónerpazdarynyń respýblıkalyq baıqaýynda, 1939 jyly halyqtyq mýzyka aspaptarynda oryndaýshylardyń Búkilodaqtyq baıqaýynda 1-oryn alyp, «Dombyranyń Jambyly» atandy. Óz janynan shyǵarǵan «Bulbul», «Baıjuma», «Kógentúp», «Jeńis», «Ana amanaty», «Segizinshi naýryz», «Saýynshy», «Eńbek Eri» sııaqty túrli shyǵarmalary arqyly Qurmanǵazy, Dáýletkereılerdiń kúıshilik dástúrin damytyp, ony jańa bir beleske kóterdi. Onyń shyǵarmashylyq ómir joly týraly jazýshy S.Baqbergenov «Qaıran sheshem» (1963) atty roman jazdy. Al sýretshi A.Cherkasskıı (1946 jyly) men G.Ysmaıylova (1963 jyly) onyń beınesin qylqalammen keskindedi. Qazirgi tańda Atyraýda Dına Kenjeqyzynyń esimimen atalatyn halyq aspaptar orkestri bar.
