Quıryqtykólde shynymen 20 mln tonna sırek metall bar ma — mınıstrlik jaýaby
ASTANA. KAZINFORM — Ónerkásip jáne qurylys mınıstrligi Geologııa komıtetiniń tóraǵasy Erlan Aqbarov Qazaqstandy sırek metall qorynyń kólemi boıynsha álemdegi úshinshi memleketke aınaldyrady delingen Quıryqtykól ýchaskesinde qansha ken bolýy múmkin ekenin aıtty.
— Quıryqtykól ýchaskesi memlekettik bıýdjet esebinen jasalǵan barlaý nátıjesinde anyqtalǵan. Qazir ol jerde sırek kezdesetin metaldardyń boljamdy qory belgili. Bolashaqta ol jerde geologııalyq barlaý jumystary júrgizileıin dep jatyr. Bizdiń ulttyq taý-ken kompanııasy júrgizedi. Sonyń nátıjesi boıynsha ınvestor qaralady. Qazirgi qory bizdiń boljam boıynsha 1 mln tonnaǵa jýyq. Biraq ol bolashaqta aýqymy úlken zertteýdi talap etetin ýchaske bolyp sanalady, — dedi ol.
Al buǵan deıin atalǵan ýchaskede 20 mln tonna ken bar ekenin halyqaralyq BAQ jarysa jazǵan bolatyn.
— Bizde ken qoryn anyqtaıtyn túrli sanat bar. S2 sanaty boıynsha 1 mln tonnaǵa jýyq ken bar. Al V1, V2, V3 sanattary boljamdyq sanat boıynsha 20 mln tonnadan asaýy múmkin. Biraq ony dáleldeý kerek, — dedi komıtet basshysy.
Eske salsaq Ónerkásip jáne qurylys vıtse-mınıstri Iran Sharhan Quıryqtykól ken ornynda barlaý jumystary aıaqtalǵany týraly aıtqan edi.
Aıta ketelik Bektenov taý-ken alpaýyttarynyń aınalasynda orta bıznes beldeýin uıymdastyrýdy tapsyrǵan edi.