Quıryqtykól ken ornynda barlaý jumystary aıaqtaldy – mınıstrlik

ASTANA. KAZINFORM – Quıryqtykól ken ornynyń qory 800 myń tonna, al boljamdy resýrstary 935 myń tonnaǵa baǵalanyp otyr. Bul týraly Ónerkásip jáne qurylys vıtse-mınıstri Iran Sharhan málim etti.

- Búginde álemdik deńgeıdegi Quıryqtykól sırek jer metaldary ken ornynda barlaý jumystary aıaqtaldy. Onyń jıyntyq qory 800 myń tonna, al boljamdy resýrstary 935 myń tonnaǵa baǵalanyp otyr, onyń ishinde tserıı men lantanoıdtar da bar. Salanyń damýy ishki ózgeristermen qatar júrip jatyr, - dedi Iran Sharhan elordada ótip jatqan 15-shi halyqaralyq taý-ken metallýrgııa kongresinde.

Vıtse-mınıstrdiń málimdeýinshe, geologııalyq barlaý salasynda jáne tehnıkalyq joǵary oqý oryndarynda jer qoınaýyn modeldeýde jasandy ıntellektige negizdelgen tsıfrlyq sheshimder engizilip jatyr.

- Turaqtylyq biz úshin jaı uran emes - naqty mindet. Biz óndiristik tizbektiń barlyq deńgeıinde qaýipsizdik, eńbekti qorǵaý jáne ekologııalyq jaýapkershilik normalarǵa aınalýyn kózdeımiz. Sózimdi qorytyndylaı kele, Qazaqstan taý-ken metallýrgııa salasynyń jan-jaqty damýyna qaraı júıeli túrde ilgerilep kele jatyr, - deıdi ol.

Buǵan deıin habarlaǵanymyzdaı, Qazaqstan altyn qory boıynsha TOP-20 eldiń qataryna kirdi. 

Sondaı-aq jaqyn arada taý-ken kesheni salasynda 3,5 trln teńgege 5 ınvestıtsııalyq joba iske qosylady dep josparlanyp otyr. 

Aıta keteıik, elordada halyqaralyq taý-ken metallýrgııa kongresi ótip jatyr. Oǵan álemniń 20 elinen 1300 delegat qatysty.