Kúıik asýynyń eski baǵytyna 50 jyldan keıin kúrdeli jóndeý júrgizildi
ASTANA. KAZINFORM — Jambyl oblysynda halyqaralyq mańyzy bar «Tashkent — Shymkent — Taraz — Almaty — Qorǵas» avtomobıl jolynyń Kúıik asýynyń eski baǵyty arqyly ótetin 546–557 shaqyrym ýchaskesinde kólik qozǵalysynyń resmı ashylý rásimi ótti. Bul týraly Kólik mınıstrligi málim etti.
Іs-sharaǵa «QazAvtoJol» ulttyq kompanııasy» AQ basqarma tóraǵasy Darhan Imanashev, Jambyl oblysynyń ákimi Erbol Qarashókeev, Qazaqstan Respýblıkasy Parlamentiniń depýtattary, memlekettik organdardyń ókilderi, merdiger uıymdar, qoǵam qaıratkerleri jáne óńir turǵyndary qatysty.
Atalǵan ýchaskede júrgizilgen kúrdeli jóndeý jumystary Memleket basshysynyń kólik-logıstıkalyq ınfraqurylymdy damytý jáne eldegi avtomobıl joldarynyń qaýipsizdigin arttyrý jónindegi tapsyrmalaryn iske asyrý aıasynda júzege asyryldy.
Eski Kúıik asýy halyqaralyq «Ózbekstan — Qazaqstan — Qytaı» kólik dáliziniń mańyzdy bólikteriniń biri sanalady. Bul baǵyt Shymkent pen Taraz qalalaryn baılanystyryp qana qoımaı, Almaty, Jambyl, Túrkistan jáne Qyzylorda oblystaryn jalǵaıtyn negizgi kólik dálizderiniń quramyna kiredi.
Kúrdeli jóndeý nátıjesinde 1970-jyldardan beri aýqymdy jańǵyrtý kórmegen jol jabyny tolyq jańartyldy. Júrgizilgen jumystar joldyń ótkizý qabiletin arttyrýǵa, kúrdeli taýly ýchaskede kólik qozǵalysynyń qolaılylyǵyn jaqsartýǵa jáne jol-kólik oqıǵalarynyń qaýpin tómendetýge múmkindik beredi.
Saltanatty rásimde sóz sóılegen Darhan Imanashev atalǵan joldyń óńir turǵyndary men halyqaralyq tranzıt úshin erekshe mańyzǵa ıe ekenin atap ótti.
— Memleket basshysynyń tapsyrmasyna sáıkes elimizde sapaly ári qaýipsiz jol ınfraqurylymyn damytý baǵytynda júıeli jumystar júrgizilip keledi. Eski Kúıik asýy — kólik júktemesi joǵary, ásirese júk kólikteri jıi qatynaıtyn mańyzdy ýchaskelerdiń biri. Bul joldy jańǵyrtý júrgizýshilerdiń qaýipsizdigine, tranzıttik tasymaldardyń turaqtylyǵyna jáne óńiraralyq qatynastyń sapasyna tikeleı áser etedi. Jańartylǵan jol turǵyndar men kásipkerlerge, týrısterge jáne respýblıka joldaryn paıdalanýshylarǵa senimdi baǵyt bolady dep senemin, — dedi Darhan Imanashev.
Joba aıasynda 15 sý ótkizý qubyry salyndy. Bul joldyń maýsymdyq jaýyn-shashynǵa tózimdiligin arttyryp, sý ótkizý júıesiniń tıimdiligin qamtamasyz etedi. Sonymen qatar jol qurylymyn qalyptastyrý barysynda qıyrshyq tas-qum qospasy, iri túıirshikti asfaltbeton jáne ŞMA-20 markaly qıyrshyq-mastıkalyq asfaltbeton sekildi zamanaýı materıaldar qoldanyldy.
Jumysqa 182 jol mamany men 150 birlik arnaıy tehnıka jumyldyryldy. Asfaltbeton zaýyty úzdiksiz rejımde jumys istep, jalpy kólemi 130 myń tonna asfaltbeton óndirilip tóseldi. Sondaı-aq qurylys barysynda 155 myń tekshe metr topyraq, 4 myń tonna bıtým, 3,7 myń tonna tsement jáne 120 myń tonna qıyrshyq tas paıdalanyldy.
Eski Kúıik asýynyń ýchaskesindegi júk kólikteriniń ortasha táýliktik qozǵalys qarqyny 2 273 avtokólikti quraıdy. Bul kórsetkish atalǵan baǵyttyń joǵary júktemesin jáne júrgizilgen kúrdeli jóndeý jumystarynyń strategııalyq mańyzyn aıqyn kórsetedi.
Jańartylǵan ýchaskeniń paıdalanýǵa berilýi Jambyl oblysynyń tranzıttik áleýetin arttyrýǵa, jol qozǵalysy qaýipsizdigin kúsheıtýge jáne Almaty — Taraz — Shymkent — Túrkistan baǵytynda qatynaıtyn júrgizýshiler men týrıster úshin qolaıly jaǵdaı jasaýǵa múmkindik beredi.
Eske sala keteıik, Abaı oblysynda respýblıkalyq mańyzy bar «Óskemen – Semeı» avtojolynyń 147-198 shaqyrym aralyǵynda ortasha jóndeý jumystary júrgizilip jatyr.
