Kúıik alǵanda ne isteý qajet

PETROPAVL. KAZINFORM — Petropavlda 68 jastaǵy áıel monshaǵa túsip jatyp, kúıip qaldy. Tek jaǵdaıy nasharlaǵanda ǵana dárigerge kórindi. 

Petropavldaǵy kópbeıindi qalalyq jedel medıtsınalyq járdem aýrýhanasynyń málimetinshe, zeınetkerdiń beti, moıny, qulaǵy jáne sol jaq bilegi kúıgen. Ol monshada jýynyp jatyp, qaınaǵan sýǵa kúıip qalǵan eken.

Alǵashynda dárigerge barmaı, óz betimen emdelýge tyrysqan, alaıda birneshe kúnnen soń jaǵdaıy nasharlap, isiný kúsheıip, qyzýy kóterilgen.

Terisiniń 5% kúıik shalǵany anyqtalyp, jaq-bet hırýrgııasy bólimshesine jatqyzyldy. Mamandar em taǵaıyndap, jaralaryn kúndelikti tańyp otyrdy. Nátıjesinde jaǵdaıy jaqsaryp, úıge ambýlatorııalyq baqylaýǵa jiberildi.

— Kúıik kezinde alǵashqy kómek óte mańyzdy. Zaqymdanǵan jerdi dereý salqyn, biraq muzdaı emes sýmen 10–15 mınýt boıy salqyndatý qajet. Eger kıim kúıgen jerge jabyspasa, ony abaılap sheshken durys. Maı, jaqpa maı nemese ıod sııaqty zattardy jaǵýǵa bolmaıdy. Kúıgen jerge taza, qurǵaq tańǵysh tańylady. Tipti jaraqattanǵan jer az bolsa da, mindetti túrde dárigerge kóriný qajet, sebebi asqynyp ketýi múmkin, — deıdi aýrýhana dárigerleri.

Mamandardyń aıtýynsha, bet, moıyn, qol men býyndardaǵy kúıik, sondaı-aq qart adamdar men balalardaǵy kez kelgen kúıik — asa qaýipti. Ózdiginen emdelý densaýlyqqa zııan ákelýi múmkin. Sondyqtan birden maman kómegine júgingen jón.

Esterińizge salaıyq, buǵan deıin dáriger is-qımylynan densaýlyqqa zaqym kelse, saqtandyrý tólemi qalaı beriletindigin jazǵan edik.