Kúıik shalǵan talǵarlyq balaǵa Ońtústik Koreıada 70 myń dollarǵa ota jasalady
ALMATY. QazAqparat - Ońtústik Koreıa dárigerleri 7 jastaǵy kúıik shalǵan talǵarlyq balaǵa ota jasaıtyn boldy, dep habarlaıdy QazAqparat tilshisi.
Kúrdeli ota 70 000 AQSh dollaryna baǵalanyp otyr.
Bul somaǵa balanyń moıyn, bet, ıyq tustaryndaǵy jıyrylǵan teri alynyp, kollageni bar jasandy teri japsyratyn bolady.
«Dom» qaıyrymdylyq úıiniń dırektory Arýjan Saınniń aıtýynsha, osy ýaqytqa deıin qaıyrymdy qazaqstandyqtar balanyń emdelýine 3 852 411 teńge jınap bergen.
«Qazaqstandyqtar arnaıy ashylǵan shotqa 3 852 411 teńge aýdardy. «Samuryq Qazyna Trast» kompanııasy 30 000 AQSh dollaryn aýdardy. Qalǵan 28 150 AQSh dollaryn atyn atamaýdy ótingen kompanııa aýdaratyn boldy», - dedi Arýjan Saın.
Onyń aıtýynsha, Hangan Sansım kúıik ortalyǵy 3 kezeńge bólingen otany bir ýaqytta jasaýdy qolǵa alyp otyr.
«Bala ortalyqqa kelgen soń emdeý jospary qurylady. Onyń denesiniń 50 paıyzyn kúıik shalǵan. Balalardyń úlkenderden ereksheligi terisi ósedi emes pe?. Al kúıgen teri jıyrylyp qalady. Sonyń kesirinen balanyń denesi jıyrylyp aýyrady. Kolıanyń qoly, moıny, ıyqtary barlyǵy jıyrylyp qalǵan. Bala ózdiginen aýzyn jaba almaıdy. Qoly joǵary kóterilmeıtin. Qazaqstan dárigerleri tek balanyń basqa jerinen teri alyp aýystyryp sala alady. Bul jaǵdaıda Kolıanyń alatyn terisi joq dese de bolady. Hangan San Sım mamandary balaǵa jasandy teri japsyrady, bulshyq etterin qalpyna keltiredi. Búldirshinge 3 ret narkoz salmaý úshin birden keýde tusyna ota jasaýdy qolǵa almaq», - dedi Arýjan Saın.
Búginde Kolıa men onyń basy-qasynda bolatyn medıtsınalyq qyzmetshiniń sheteldik pasporty daıyn.
Dárigerlik qujattar túgel rásimdelip bolǵan soń qańtardyń sońy, aqpannyń basynda olar Ońtústik Koreıaǵa ushyp ketpek.
Qazir búldirshin «Kovcheg» balalar úıinde turyp jatyr.
«Jaqynda ǵana Astanada qolyna ota jasaldy. Ota sátti ótti. Endi Nıkolaı eki qolyn joǵary kótere alady. Balanyń múmkindigi arta tústi. Búldirshinmen ortalyqtyń pedagog mamandary aınalysyp jatyr.
Aıta ketý kerek, Talǵar aýdanynyń 7 jastaǵy turǵyny Nıkolaıdyń taǵdyry týraly eń alǵash Arýjan Saın dabyl qaqty.
Keıinirek bul isti Almaty oblystyq ákimdigi jiti baqylaýyna aldy.
Belgili bolǵandaı, balanyń anasy ishimdikke salynyp ketken.
Oblys ákiminiń baspasóz hatshysy Ǵalymurat Júkeldiń aıtýynsha, qazir anasy májbúrli túrde emdelip jatyr. Ony analyq quqyǵynan aıyrý isi ákimshilik sottyń qaraýynda.
