Kúıik shalǵan talǵarlyq balaǵa Koreıada ota jasalatyn kún belgili boldy
ALMATY. QazAqparat - Kúıik shalǵan 7 jastaǵy talǵarlyq balaǵa Ońtústik Koreıa dárigerleri 18 aqpanda ota jasaıtyn boldy, dep habarlaıdy QazAqparat tilshisi.
7 jastaǵy Nıkolaı otaǵa bir kún qalǵanda ákimdik bólgen medbıkemen birge Ońtústik Koreıanyń Seýl qalasyna attanady.
«Ota 18 aqpanǵa belgilendi. Sheteldik dárigerler operatsııa 9 saǵatqa sozylady dep josparlap otyr. Bul óte tanymal kúıik ortalyǵy. Mamandary bilikti. Hangan San Sım mamandary balaǵa jasandy teri japsyrady, bulshyq etterin qalpyna keltiredi. Búldirshinge 3 ret narkoz salmaý úshin birden keýde tusyna ota jasaýdy qolǵa almaq», - dedi «Dom» qaıyrymdylyq úıiniń dırektory Arýjan Saın.
Budan buryn jazǵanymyzdaı kúrdeli ota 70 myń AQSh dollaryna baǵalanyp otyr.
Bul somaǵa balanyń moıyn, bet, ıyq tustaryndaǵy jıyrylǵan teri alynyp, ornyna kollageni bar jasandy teri japsyrylatyn bolady.
Qazir búldirshin «Kovcheg» balalar úıinde turyp jatyr.
Aıta ketý kerek, Talǵar aýdanynyń 7 jastaǵy turǵyny Nıkolaıdyń taǵdyry týraly eń alǵash Arýjan Saın dabyl qaqty.
Keıinirek bul isti Almaty oblystyq ákimdigi jiti baqylaýyna aldy. Belgili bolǵandaı, balanyń anasy ishimdikke salynyp ketken. Oblys ákiminiń baspasóz hatshysy Ǵalymurat Júkeldiń aıtýynsha, qazir anasy májbúrli túrde emdelip jatyr. Ony analyq quqyǵynan aıyrý isi ákimshilik sottyń qaraýynda.
Qaıyrymdy qazaqstandyqtar balanyń emdelýine 3 852 411 teńge jınap berse, «Samuryq Qazyna Trast» kompanııasy 30 000 AQSh dollaryn aýdardy. Qalǵan 28 150 AQSh dollaryn belgisiz kompanııa aýdarǵan.
