Kúıik shalǵan bala aýrýhanaǵa jatqyzyldy - Almaty oblysy
ALMATY. QazAqparat - Almaty oblysynda kúıik shalǵan 7 jastaǵy bala Talǵar aýdandyq aýrýhanasyna jatqyzyldy, dep habarlaıdy QazAqparat tilshisi.
Bul týraly QazAqparat tilshisine Almaty oblysy ákiminiń baspasóz hatshysy Ǵalymurat Júkel habarlady.
«Tátesiniń qarsylyǵyna qaramastan balany májbúrlep aýrýhanaǵa jatqyzdyq. Balanyń ambýlatorııalyq kartasy, qujattary joq. Qazir balany qaraýǵa oblystyq Densaýlyq saqtaý basqarmasy basshysy orynbasarynyń mindetin atqarýshy Elmıra Ahmetova bastaǵan dárigerler konsılıým jınap jatyr. Ári qaraı emdeý sharalary talqylanady», - dedi Ǵalymurat Júkel.
Qazir 7 jastaǵy bala Almaty oblysy Talǵar aýdanynda turyp jatyr. 2015 jyly úıde pesh jarylyp, balanyń keýde tusyn, betin kúıik shalǵan.
Qoǵam qaıratkeri Arýjan Saın áleýmettik jelide denesin kúıik shalǵan, ózdiginen aýzyn jaba almaıtyn bala týraly jazba qaldyrǵan bolatyn.
«SOS! Sańyraýlar men soqyrlar eli... Denesiniń jartysyn 1,2,3,4 dárejedegi kúıik shalǵan bala turyp jatyr. Buryn oblystyq aýrýhanada emdelgen. Qazirgi jaǵdaıy óte múshkil. Terisi jıyrylyp, tartylǵan kezde balanyń janyna batady. Buryn mundaı balalardy shetelge emdeýge jiberetinbiz. Olarǵa jasandy teri japsyrylady. Ol balamen birge ósýi tıis. Bizde ondaı emdeý jasalmaıdy. Balanyń aýzy jabylmaıdy, saýsaqtary jıyrylyp qalǵan. Oblystyq, aýdandyq dárigerler qaıda qarap otyrǵan?», - dedi Arýjan Saın.
Ákimdik ókiliniń aıtýynsha, balanyń múshkil hali qoǵamda úlken shý týǵyzdy. Sol sebepti jergilikti ákimdik jaǵdaıdy baqylaýǵa aldy.
«Ázirge qyzmettik tekserý bastalǵan joq. Bireýdi jazalaý týraly áńgime aıtýǵa áli erte. Birinshi kezekte balany aýdandyq aýrýhanaǵa jatqyzýǵa kúsh salyp jatyrmyz. Eń aldymen balany emdeý kerek. Bala medıtsınalyq kómekke muqtaj. Odan ári qalaı emdeý kerektigi kelesi másele», - dedi Ǵalymurat Júkel.
