Kúıik shalǵan 7 jastaǵy Nıkolaı Kessenge jasandy teri transplantatsııalandy
ALMATY. QazAqparat - Kúıik shalǵan 7 jastaǵy Almaty oblysynyń turǵyny Nıkolaı Kessenge ońtústikkoreıalyq dárigerler ota jasady. «QazAqparat» HAA redaktsııasy balanyń jaǵdaıyn bilý úshin Hangan Sonsım klınıkasynyń hırýrgy Djong Ýkpen baılanysqa shyqty.
Professordyń aıtýynsha, 3 saǵatqa sozylǵan ota sátti ótken.
40 jyl boıy kúıik aýrýlaryn emdep kelgen ortalyqtyń hırýrgy óz praktıkasynda mundaı jaǵdaıdy birinshi ret kezdestirgen.
«Balanyń urtyn qalyptastyrý úshin moıny men beti aýmaǵyna óz terisimen qosa jasandy teri kombınatsııasy transplantatsııalandy. Endi balanyń aýzy tolyq jabylady. Balanyń qoly, ıyǵy, kókirek tusyna áli de ota jasaý kerek. Mundaı kólemdegi kúıikti praktıkamda birinshi ret kórip turmyn», - dedi Djong Ýk.
Seýldik dárigerler 7-10 kún ótken soń balaǵa taǵy bir ota jasamaq. Bul joly Nıkolaıdyń qoldary men ıyǵyna jasandy teri japsyrylady.
«Sodan soń Nıkolaı Qazaqstanǵa qaıtyp oralady. Teri shamamen 1 jyl ishinde jazylsa, qaıtadan ota jasaýǵa keledi», - dedi Djong Ýk.
Almaty oblysy ákiminiń baspasóz hatshysy Ǵalymurat Júkel Feısbýktegi paraqshasynda Nıkolaıǵa Seýldiń aýa raıy men tamaǵy jaqqanyn jazdy.
«Qazir Nıkolaı Seýldegi Hangan Sonsım emhanasynda em qabyldap jatyr. Káristerdiń tamaǵy balaǵa jaqqan eken. Nıkolaı tola bastady», - dedi Ǵalymurat Júkel.
Aıta ketý kerek, Talǵar aýdanynyń 7 jastaǵy turǵyny Nıkolaıdyń taǵdyry týraly eń alǵash Arýjan Saın dabyl qaqty.
Keıinirek bul isti Almaty oblysynyń ákimdigi jiti baqylaýyna aldy. Belgili bolǵandaı, balanyń anasy ishimdikke salynyp ketken. Oblys ákiminiń baspasóz hatshysy Ǵalymurat Júkeldiń aıtýynsha, qazir anasy májbúrli túrde emdelip jatyr. Ony analyq quqyǵynan aıyrý isi ákimshilik sottyń qaraýynda.
Qaıyrymdy qazaqstandyqtar balanyń emdelýine 3 852 411 teńge jınap berse, «Samuryq Qazyna Trast» kompanııasy 30 000 AQSh dollaryn aýdardy. Qalǵan 28 150 AQSh dollaryn belgisiz kompanııa aýdarǵan.
Balany emdeýge barlyǵy 70 myń AQSh dollary jumsaldy.
